पणजी, ३० जुलै: ३१ ऑगस्टपासून सुरू होणाऱ्या गोवा विधानसभेच्या आगामी अधिवेशनाच्या पार्श्वभूमीवर विरोधी पक्षांकडून जनतेच्या समस्या आणि सूचना थेट विधानसभेत मांडण्यासाठी स्वतंत्र लोकसहभाग उपक्रम सुरू करण्यात आले आहेत. काँग्रेस विधिमंडळ पक्ष (CLP) आणि गोवा फॉरवर्ड पक्षाने नागरिकांना त्यांच्या स्थानिक तसेच राज्यस्तरीय प्रश्नांची माहिती पाठविण्याचे आवाहन केले आहे.

विरोधी पक्षनेते युरी आलेमाव यांनी “कनेक्ट विथ गोवा सीएलपी – आवाज तुमचो, सांगात आमचो” या उपक्रमाची घोषणा करत प्रत्येक गोमंतकीयाने लोकशाही प्रक्रियेत सक्रिय सहभाग नोंदवावा, असे आवाहन केले. विधानसभा हे जनतेच्या आशा-आकांक्षा आणि समस्यांचे सर्वोच्च व्यासपीठ असून, नागरिकांकडून प्राप्त होणाऱ्या सूचना, तक्रारी आणि निवेदने अभ्यासून आगामी अधिवेशनात प्रश्न, लक्षवेधी सूचना, चर्चा आणि इतर संसदीय माध्यमांतून मांडली जातील, असे त्यांनी स्पष्ट केले.

हा उपक्रम आमदार एल्टन डी’कोस्टा आणि ॲड. कार्लुस अल्वारीस फेरेरा यांच्या नेतृत्वाखाली राबविण्यात येणार असून युवक, महिला, शेतकरी, मत्स्यव्यावसायिक, व्यावसायिक, ज्येष्ठ नागरिक आणि विविध सामाजिक संस्थांनी यात सहभागी व्हावे, असे आवाहन करण्यात आले आहे. नागरिकांना ई-मेल आणि व्हॉट्सअॅपद्वारे आपल्या सूचना पाठविण्याची सुविधा उपलब्ध करून देण्यात आली आहे.

दरम्यान, गोवा फॉरवर्ड पक्षानेही आगामी विधानसभा अधिवेशनासाठी जनतेच्या सूचना मागविण्याची मोहीम सुरू केली आहे. “Your Voice Matters. Your Issues Deserve to be Heard” या संदेशासह पक्षाने रस्ते, पायाभूत सुविधा, रोजगार, शिक्षण, आरोग्य, शेती, पर्यटन आणि स्थानिक स्वराज्य संस्थांशी संबंधित प्रश्न नागरिकांनी पाठवावेत, असे आवाहन केले आहे.

गोवा फॉरवर्डने म्हटले आहे की, नागरिकांकडून प्राप्त होणाऱ्या सर्व सूचना व समस्यांचा अभ्यास करून त्या विधानसभा अधिवेशनात मांडण्याचा प्रयत्न केला जाईल. यासाठी ४ ऑगस्ट २०२६ ही अंतिम मुदत निश्चित करण्यात आली असून नागरिकांना ई-मेलद्वारे आपली मते आणि सूचना पाठविण्याचे आवाहन करण्यात आले आहे.