गांवकारी, दि. ८ (प्रतिनिधी) : उत्तर गोव्यात भाजपचा प्रभाव असलेल्या विधानसभा मतदारसंघांमध्ये राजकीय आव्हान उभे करण्यासाठी आम आदमी पक्षाने (आप) मोर्चेबांधणी सुरू केली आहे. भाजपच्या पारंपरिक मतदारांमधील नाराजीचा फायदा उठवून पक्षाचा जनाधार वाढविण्याची रणनीती आखण्यात येत आहे. याच पार्श्वभूमीवर ‘आप’चे राष्ट्रीय संयोजक अरविंद केजरीवाल यांनी गुरुवारी कुंभारजुवा येथे कार्यकर्त्यांशी संवाद साधला, तर पणजीत वरिष्ठ पदाधिकाऱ्यांची बैठक घेऊन संघटनात्मक तयारीचा आढावा घेतला. भाजप आणि काँग्रेसच्या कथित राजकीय संगनमताला पर्याय म्हणून ‘आप’ला उभे करण्याचा निर्धार या बैठकीत व्यक्त करण्यात आला.

गोव्यात काँग्रेसला मतदान करणे म्हणजे अप्रत्यक्षपणे भाजपलाच सत्तेत आणण्यास मदत करणे होय. काँग्रेसच्या तिकिटावर निवडून आलेले आमदार भाजपमध्ये प्रवेश करीत असल्याने जनतेचा दोन्ही पक्षांवरील विश्वास उडाला आहे. भाजप आणि काँग्रेसच्या या ‘जॉइंट व्हेंचर’ला आम आदमी पक्ष हाच एकमेव विश्वासार्ह पर्याय असल्याचा दावा अरविंद केजरीवाल यांनी केला.

कुंभारजुवा येथे आयोजित स्वयंसेवकांच्या बैठकीत केजरीवाल यांनी स्थानिक कार्यकर्त्यांशी संवाद साधला. बदल आणि विकासाच्या अपेक्षेने जनतेने भाजपला सत्ता दिली. मात्र, भ्रष्टाचार, पक्षांतरे आणि जनतेच्या अपेक्षांचा विश्वासघात यापलीकडे भाजपने काहीच दिले नाही, अशी टीका यावेळी करण्यात आली. भाजपने आपल्या पारंपरिक मतदारांना गृहीत धरल्यामुळे त्यांच्यात नाराजी वाढत असल्याचा दावा ‘आप’च्या कार्यकर्त्यांनी केला.

पणजीतील संघटनात्मक बैठकीत केजरीवाल यांनी पदाधिकाऱ्यांना बूथ पातळीवर संघटना मजबूत करण्याचे निर्देश दिले. प्रत्येक मतदारापर्यंत पोहोचून स्थानिक समस्या समजून घ्याव्यात आणि जनतेशी थेट संपर्क वाढवावा, असे आवाहन त्यांनी केले. केवळ भाजपविरोधी वातावरणावर अवलंबून न राहता पक्षाची स्वतंत्र संघटनात्मक ताकद निर्माण करण्यावर भर देण्याची भूमिका या बैठकीत मांडण्यात आली.

भाजपने मतदारांचा विश्वासघात केला : वाल्मिकी नाईक

‘आप’चे गोवा प्रदेशाध्यक्ष वाल्मिकी नाईक यांनी भाजपवर जोरदार टीका केली. उत्तर गोवा हा आपला बालेकिल्ला असल्याचा दावा भाजप करीत असला तरी काँग्रेसमधून पक्षांतर करून आलेल्या नेत्यांना पक्षात सामावून घेत भाजपने स्वतःच्याच मतदारांचा विश्वासघात केला आहे. अशा नेत्यांना जनतेच्या प्रश्नांपेक्षा स्वतःच्या राजकीय हितसंबंधांची अधिक चिंता असल्याचा आरोप त्यांनी केला.

भाजपच्या कारभाराला कंटाळलेले मतदार काँग्रेसकडेही पर्याय म्हणून पाहण्यास तयार नाहीत. काँग्रेसचा उमेदवार निवडून आला तरी तो पुढे भाजपमध्ये जाणार, अशी भावना मतदारांमध्ये निर्माण झाली आहे. त्यामुळे उत्तर गोव्यात नवीन राजकीय पर्यायासाठी संधी निर्माण होत असल्याचा दावा नाईक यांनी केला.

भाजपच्या मतदाराधाराला तडे : प्रशांत नाईक

‘आप’चे गोवा संघटन सचिव प्रशांत नाईक यांनी भाजपच्या पारंपरिक मतदारांमध्ये असंतोष वाढत असल्याचा दावा केला. वाढीव वीजबिले, अनियमित पाणीपुरवठा, अपुरी सार्वजनिक बससेवा, बेरोजगारी आणि ढासळती कायदा-सुव्यवस्था या प्रश्नांमुळे जनता त्रस्त आहे. भाजपच्या विकासाच्या आश्वासनांबद्दल मतदारांमध्ये भ्रमनिरास झाल्याचे त्यांनी सांगितले.

गेल्या दहा वर्षांत भाजप आणि काँग्रेसच्या कथित राजकीय संगनमतामुळे गोव्याची लूट झाल्याचा आरोपही प्रशांत नाईक यांनी केला. दोन्ही पक्षांनी जनहितापेक्षा स्वतःच्या राजकीय आणि आर्थिक फायद्याला प्राधान्य दिले आहे. या ‘पॉकेट फर्स्ट’ राजकारणाला जनता कंटाळली असून पर्यायी नेतृत्वाच्या शोधात असल्याचे ते म्हणाले.

दरम्यान, उत्तर गोव्यातील भाजपच्या प्रभावक्षेत्रातच संघटनात्मक विस्तार करण्यावर ‘आप’ने भर दिल्यामुळे आगामी विधानसभा निवडणुकीच्या दृष्टीने पक्षाने आपली राजकीय दिशा स्पष्ट केल्याचे दिसते. मात्र, भाजपविरोधी नाराजीचे मतांमध्ये रूपांतर करण्यासाठी ‘आप’ला स्थानिक पातळीवर कितपत संघटनात्मक बळ उभे करता येते, यावर या रणनीतीचे यश अवलंबून राहणार आहे.