तिरुवनंतपुरम, दि. २९ जुलै : नुकतेच २ केरळ बटालियन, राष्ट्रीय छात्र सेना (NCC) चे कमांडिंग ऑफिसर म्हणून पदभार स्वीकारलेले कर्नल अमित आनंद परब (सेना पदक) यांनी आज केरळचे राज्यपाल राजेंद्र विश्वनाथ आर्लेकर यांची लोकभवन, तिरुवनंतपुरम येथे सदिच्छा भेट घेतली. यावेळी त्यांच्यासमवेत त्यांच्या पत्नी सौ. रचना अमित परब उपस्थित होत्या.

ही भेट कर्नल परब यांच्यासाठी विशेष भावनिक ठरली. गोव्यात आमदार म्हणून कार्यरत असताना श्री. आर्लेकर यांच्याशी परिचय झालेला असल्याने, आज त्याच व्यक्तिमत्त्वाला केरळच्या राज्यपाल या मानाच्या घटनात्मक पदावर पाहून त्यांना विशेष आनंद झाला. गोव्याच्या जनतेची सेवा करणाऱ्या लोकप्रतिनिधीपासून राज्यपालपदापर्यंतचा त्यांचा प्रवास हा सार्वजनिक सेवेसाठी असलेली त्यांची निष्ठा आणि राष्ट्रनिर्मितीची बांधिलकी अधोरेखित करणारा असल्याचे कर्नल परब यांनी नमूद केले.

केरळमध्ये कार्यरत असलेल्या एका गोमंतकीय अधिकाऱ्याच्या नात्याने आपल्या मातृभूमीतील एका मान्यवर नेत्याची ‘गॉड्स ओन कंट्री’मध्ये भेट घेणे हा अत्यंत संस्मरणीय अनुभव असल्याचे त्यांनी सांगितले. या भेटीत गोव्याच्या आठवणींना उजाळा मिळाला तसेच देशाच्या विविध भागांना जोडणाऱ्या राष्ट्रीय ऐक्याच्या भावनेलाही बळ मिळाले.

या आत्मीय व प्रेरणादायी संवादासाठी, दिलेल्या बहुमोल वेळेसाठी आणि आदरातिथ्यासाठी कर्नल अमित परब यांनी राज्यपाल श्री. आर्लेकर यांचे मनःपूर्वक आभार मानले. युवकांच्या सर्वांगीण विकासासाठी राष्ट्रीय छात्र सेना करत असलेल्या कार्याबाबत तसेच राष्ट्रीय एकात्मता आणि राष्ट्रसेवेच्या मूल्यांबाबतही यावेळी सकारात्मक चर्चा झाली.