गांवकारी,दि. १९ : गोवा विधानसभेचे माजी उपसभापती, ख्यातनाम लेखक, नाटककार, कवी आणि बहुजन नेते स्व. विष्णू सूर्या वाघ यांच्या ६२ व्या जयंतीनिमित्त ‘विष्णू सूर्या वाघ मित्रपरिवारा’तर्फे त्यांच्या स्मृतिप्रीत्यर्थ वार्षिक व्याख्यानमाला सुरू करण्यात येणार आहे. या व्याख्यानमालेचे उद्घाटन शुक्रवार, २४ जुलै २०२६ रोजी सायंकाळी ५.३० वाजता पणजी येथील इन्स्टिट्यूट मिनेझीस ब्रागांझाच्या मुख्य सभागृहात होणार आहे.

व्याख्यानमालेच्या पहिल्या पुष्पात दिल्ली येथील माजी प्राध्यापक तथा प्रख्यात बहुजन विचारवंत आणि लेखक डॉ. लक्ष्मण यादव हे ‘बहुजन राजकारण : परंपरा और इतिहास’ या विषयावर उद्घाटकीय व्याख्यान देणार आहेत. कार्यक्रमाच्या अध्यक्षस्थानी गोवा विद्यापीठाचे प्राध्यापक आणि युवा विचारवंत प्रा. युगांक नाईक असतील.

विष्णू सूर्या वाघ यांच्या पुरोगामी विचारांचा वारसा नव्या पिढीपर्यंत पोहोचविणे आणि गोव्यातील बहुजन समाजात वैचारिक चळवळीला अधिक बळ देणे, या उद्देशाने यंदापासून या वार्षिक व्याख्यानमालेची सुरुवात करण्यात येत असल्याचे आयोजकांनी सांगितले.

विष्णू वाघ मित्रपरिवारातर्फे गेल्या काही वर्षांपासून वाघ यांच्या स्मृतिप्रीत्यर्थ काव्यवाचन स्पर्धा, वक्तृत्व स्पर्धा आणि परिसंवादांसह विविध राज्यस्तरीय उपक्रमांचे आयोजन करण्यात येत आहे. या उपक्रमांचा पुढचा टप्पा म्हणून आता दरवर्षी स्मृती व्याख्यान आयोजित करण्याचा निर्णय घेण्यात आला आहे.

उद्घाटकीय व्याख्यानाचे प्रमुख वक्ते डॉ. लक्ष्मण यादव हे उच्च शिक्षण, सामाजिक न्याय तसेच बहुजन, दलित आणि आदिवासी समाजाच्या हक्कांच्या प्रश्नांवर सातत्याने भूमिका मांडणारे विचारवंत म्हणून ओळखले जातात. अलाहाबाद विद्यापीठातून सुवर्णपदकासह उच्च शिक्षण पूर्ण केल्यानंतर त्यांनी दिल्ली विद्यापीठातून संत-कवी तुलसीदास यांच्या साहित्यावर संशोधन करून पीएच.डी. पदवी संपादन केली. दिल्ली विद्यापीठाच्या झाकीर हुसेन दिल्ली कॉलेजमध्ये त्यांनी सुमारे १४ वर्षे हिंदीचे सहाय्यक प्राध्यापक म्हणून अध्यापन केले.

समाजवाद, आंबेडकरवाद आणि स्त्रीवादी विचारांच्या प्रभावातून सामाजिक व राजकीय प्रबोधनाच्या क्षेत्रात सक्रिय असलेल्या डॉ. यादव यांनी सध्या पूर्णवेळ या कार्याला वाहून घेतले आहे. उच्च शिक्षण व्यवस्थेतील वास्तव मांडणारे ‘प्रोफेसर की डायरी’ आणि सामाजिक समतेच्या मुद्द्यांवर भाष्य करणारे ‘जाती जनगणना’ ही त्यांची पुस्तके विशेष चर्चेत राहिली आहेत.

विष्णू वाघ मित्रपरिवाराचे निमंत्रक आणि स्व. विष्णू वाघ यांचे बंधू प्रा. रामराव सूर्या वाघ यांनी वाघ यांच्या चाहत्यांसह लेखक, साहित्यिक, सामाजिक कार्यकर्ते आणि विचारवंतांनी या व्याख्यानाला मोठ्या संख्येने उपस्थित राहावे, असे आवाहन केले आहे. गोव्यात बहुजनवादाची वैचारिक चळवळ अधिक व्यापक आणि बळकट करण्यासाठी या उपक्रमात सहभागी व्हावे, असेही त्यांनी म्हटले आहे.

२४ जुलै रोजी सायंकाळी ५.३० वाजता इन्स्टिट्यूट मिनेझीस ब्रागांझा, पणजी येथे होणारा हा कार्यक्रम सर्वांसाठी खुला असल्याचे आयोजकांनी स्पष्ट केले आहे.