आयआयटी फर्मागुडीतच होणार : मुख्यमंत्री

गांवकारी, दि. २९ (प्रतिनिधी)

फर्मागुडीतील नियोजित आयआयटी प्रकल्पाबाबत दोन्ही स्थानिक आमदारांशी चर्चा झाली आहे. याव्यतिरिक्त या भागातील स्थानिकांशीही संवाद साधण्यात आला. याठिकाणी श्री कटमगाळ दादाच्या पवित्र स्थळाला अजिबात हात लावला जाणार नाही. या धार्मिक स्थळाचे पावित्र्य जपूनच याठिकाणी आयआयटीचे काम होईल, असे मुख्यमंत्री डॉ. प्रमोद सावंत यांनी स्पष्ट केले.
फर्मागुडी येथील श्री कटमगाळ दादाचे स्थान आयआयटीमुळे धोक्यात येईल, या भीतीतून रविवारी शेकडो लोक एकवटले. विषय केवळ कटमगाळ दादाच्या स्थळाचा नाही. हा राखणदार असल्याने संपूर्ण जागा या देवाच्या अधिपत्याखाली येते. या परिसरात देवाचा संचार असतो आणि त्यामुळे या प्रकल्पामुळे देवाच्या पारंपरिक वाटा बंद होतील व त्याचे परिणाम स्थानिकांना भोगावे लागतील, अशी भीती व्यक्त करण्यात आली. या जागेच्या मालकालाही याची प्रचिती आलेली आहे. सरकार कटमगाळ दादाच्या जागेकडे खेळ करून स्वतःसाठी संकट ओढवून घेत आहे, असेही यावेळी सांगण्यात आले.
फर्मागुडीचा पठार जलसंवर्धन स्त्रोत
फर्मागुडीचा पठार आणि विशेषतः श्री कटमगाळ दादाची ही जागा म्हणजे जलसंवर्धनाचा स्त्रोत आहे. या पठारावरच खालच्या शेतकऱ्यांचे मळे फुलतात. येथील शेती तसेच अन्य कृषी उत्पादनासाठी या पठाराचे जलस्त्रोतच उपयोगात येतात. हा पठार म्हणजे सभोवतालच्या गावांचा मोठा आधार आहे, अशी माहितीही यावेळी देण्यात आली.