चर्चा स्थगित ठेवण्याचा गोवा फॉरवर्डचा निर्णय

गांवकारी, दि. ५ (प्रतिनिधी)

काँग्रेस-गोवा फॉरवर्ड पक्षाच्या युतीची प्राथमिक चर्चा सुरू होऊन काही दिवसही उलटले नाहीत, तोच गोवा फॉरवर्ड पक्षाच्या राजकीय व्यवहार समितीने युतीची चर्चा स्थगित ठेवण्याचा निर्णय घेतला आहे. पक्षाने सर्व ४० मतदारसंघात संघटनात्मक बांधणी हाती घेण्याची घोषणा करून स्वबळाचे स्पष्ट संकेत दिले आहेत.
राज्यातील विरोधी पक्षांनी एकत्रितपणे भाजपचा सामना करावा, अशी इच्छा बहुतांश गोमंतकीयांची आहे. हे ओळखून केवळ लोकांच्या दबावापोटी प्रमुख विरोधी पक्षांनी युतीसाठी हालचाली सुरू केल्या होत्या. काँग्रेस पक्षानेही प्रभारी माणिकराव ठाकरे यांच्या अध्यक्षतेखाली युतीची चर्चा करण्यासाठी समिती नियुक्त केली होती. पहिल्या फेरीची बैठक विजय सरदेसाई आणि गिरीश चोडणकर यांच्यात झाल्यानंतर विरोधी पक्षनेते युरी आलेमाव यांनी विरोधी आमदारांच्या बैठकीचे आमंत्रण दिले नाही. या विषयावरून विजय सरदेसाई बरेच खवळले आहेत.
युतीच्या चर्चेला स्थगिती
गोवा फॉरवर्ड पक्षाच्या राजकीय व्यवहार समितीची बैठक आज संपन्न झाली. या बैठकीत युतीबाबतच्या घडामोडींवर सविस्तर चर्चा झाली. विरोधी पक्षनेते युरी आलेमाव यांची कृती तसेच विविध मतदारसंघांतील युतीबाबतचा कानोसा पाहिल्यानंतर काँग्रेसबाबत लोकांच्या मनात अजूनही साशंकता आहे. दोन वेळा काँग्रेसचे आमदार भाजपात गेले असल्यामुळे ते हॅट्रिक तर करणार नाहीत ना, असा संशय लोकांना आहे, असे मत विजय सरदेसाई यांनी व्यक्त केले. तूर्त सर्व ४० मतदारसंघात पक्षाच्या संघटनात्मक बांधणीच्या कामाला जोर देण्याचा निर्णय या बैठकीत घेण्यात आला.