ताम्हणकरांच्या तक्रारीवर जलस्त्रोत खात्याची कारवाई

गांवकारी, दि.१० (प्रतिनिधी)

राज्यातील विविध ठिकाणी सुरू असलेल्या कामांमध्ये गंभीर आर्थिक व प्रशासकीय अनियमितता झाल्याचा आरोप आरटीआय कार्यकर्ते सुधीप ताम्हणकर यांनी तक्रारीद्वारे केला होता. या तक्रारीची दखल घेत जलस्त्रोत खात्याचे प्रशासकीय संचालक रमेश नाईक यांनी संबंधित विभागांच्या कार्यकारी अभियंत्यांना दहा दिवसांत सविस्तर अहवाल सादर करण्याचे निर्देश दिले आहेत.
जलस्त्रोत खात्याची अनेक कामे सध्या सुरू आहेत. ताम्हणकर यांच्या तक्रारीनुसार, ही कामे देताना केंद्रीय सार्वजनिक बांधकाम विभागाच्या (सीपीडब्ल्यूडी) नियमावली व आर्थिक नियमांचे उल्लंघन झाले आहे. विशेषतः मेसर्स बाकीया कन्स्ट्रक्शन्स प्रा. लि., पीआरएन कन्स्ट्रक्शन्स आणि साऊथ ईस्ट कन्स्ट्रक्शन्स या ठेकेदारांचा उल्लेख करण्यात आला आहे.
तक्रारीतील मुख्य आरोप
• अतिरिक्त कामे पूर्वपरवानगीशिवाय करून नंतर मंजुरी घेण्यात आली
• काम पूर्ण झाल्यानंतर बदलांसह सुधारित अंदाजपत्रके तयार करण्यात आली
• निविदा प्रक्रिया टाळून थेट कामे देण्यात आली
• आर्थिक नियम व खरेदी प्रक्रियेचे उल्लंघन
तक्रारीसोबत तांत्रिक आराखडे, अंदाजपत्रके व तुलनात्मक निवेदन जोडण्यात आले असून कामे फुगवून दाखवली गेल्याचा आरोप आहे. ताम्हणकर यांनी इशारा दिला आहे की अशा पद्धतींमुळे आर्थिक शिस्त बिघडू शकते व सार्वजनिक उत्तरदायित्व धोक्यात येऊ शकते.
प्रशासकीय संचालक रमेश नाईक यांनी सर्व विभागांच्या कार्यकारी अभियंत्यांना या आरोपांची चौकशी करून ठराविक कालावधीत अहवाल सादर करण्याचे आदेश दिले आहेत. विभागीय चौकशीच्या निष्कर्षांवर पुढील कारवाई होणार आहे.