ठरावांची पूर्तता करण्याची जोरदार मागणी

गांवकारी, दि.२५ (प्रतिनिधी)

कारापूर-सर्वणच्या ग्रामसभेत नियोजित लोढा प्रकल्पाला दिलेले परवाने मागे घेण्यासंबंधी मंजूर झालेल्या ठरावांची तात्काळ पूर्तता करावी, अशी मागणी करून कारापूरवासियांनी आज पंचायतीवर धडक दिली. या ठरावांची पूर्तता कधी करणार हे सरपंचांनी लोकांसमोर स्पष्ट करावे, अशी मागणी करून ग्रामस्थांनी पंचायत मंडळाला धारेवर धरले.
कारापूर-सर्वण पंचायत मंडळाची आज बैठक होती. या बैठकीसाठी आंदोलकांचे प्रतिनिधी उपस्थित होते. ठराव पंचायत मंडळाच्या बैठकीत समंत करण्यात आले. ठराव समंत झाल्यानंतर त्याची प्रत देण्याची विनंती ग्रामस्थांनी केली. यावेळी सरपंच आणि सचिवांकडून एकमेकांवर जबाबदारी ढकलण्याचा प्रयत्न झाला. ग्रामस्थांनी हे ठराव कधी कार्यान्वित करणार, असा सवाल करून ठरावांची प्रत हवी, अशी मागणी केली असता ती पुढील आठवड्यात देऊ, असे सांगण्यात आले.
ग्रामस्थांसमोरच ठराव पूर्ततेचे वचन द्या
ग्रामस्थांनी थेट पंचायतीवर मोर्चा काढून सरपंच किंवा सचिवांनी ग्रामस्थांसमोरच ठरावांच्या पूर्ततेचे वचन द्यावे, अशी मागणी केली. ग्रामसभेत जरी सर्व पंचसदस्यांनी लोढा विरोधी आंदोलनाला पाठींबा दिला असला तरी अजूनही ही पंचमंडळी उघडपणे पुढे येत नाहीत. केवळ वेळ मारून नेण्यासाठी आंदोलनाला पाठींबा दर्शवून काहीच उपयोग नाही. कारापूर-सर्वण गावच्या रक्षणार्थ पंचमंडळींनी पुढे यायला हवे, अशी मागणीही लोकांनी केली. यावेळी महिलावर्ग बराच आक्रमक झाला. आज आंदोलनाला २१ दिवस पूर्ण झाल्यामुळे पंचायतीने ठरावांची पूर्तता करून ग्रामस्थांच्या मागणीची कार्यवाही करावी, अशी मागणीही करण्यात आली.
पोलिस निरीक्षक दाखल
आंदोलकांनी थेट पंचायतीवर धडक दिल्यानंतर तिथे ताबडतोब पोलिस दाखल झाले. यावेळी वातावरण बरेच तापले होते. डिचोलीचे पोलिस निरीक्षक विजय राणे स्वतः हजर झाले. सरपंचांनी पोलिस निरीक्षकांच्या संरक्षणात ग्रामस्थांच्या प्रश्नांना उत्तरे देत पुढील आठवड्यात ठरावांची प्रत स्थानिकांना देण्याचे मान्य केले.