Gaonkaari
पेडणे (प्रतिनिधी) : आगामी विधानसभा निवडणुकीच्या पार्श्वभूमीवर पेडणे मतदारसंघातील राजकीय हालचालींना वेग आला असून, तोरसे पंचायत क्षेत्रातील युवा-युवती, माजी सरपंच, माजी पंच, सामाजिक कार्यकर्ते, ज्येष्ठ नागरिक आणि स्थानिकांनी ‘मिशन फॉर लोकल’चे अध्यक्ष तथा पेडणे मतदारसंघाचे नेते राजन कोरगावकर यांच्या नेतृत्वाला जाहीर पाठिंबा दिला.
माजी सरपंच प्रकाश शेट्ये आणि प्रेरणा शेट्ये यांच्या पुढाकाराने आयोजित कार्यक्रमाला मोठ्या संख्येने नागरिक उपस्थित होते. यावेळी “पेडणेच्या विकासासाठी स्थानिक आणि सक्षम नेतृत्वाची गरज आहे” असा सूर उपस्थितांनी व्यक्त केला. आगामी विधानसभा निवडणुकीत कोरगावकर यांच्या विजयासाठी एकजुटीने काम करण्याचा निर्धारही करण्यात आला.
‘पेडणेच्या विकासासाठी स्थानिक नेतृत्वाला संधी द्या’ — राजन कोरगावकर
नागरिकांनी दिलेल्या पाठिंब्याबद्दल आभार व्यक्त करताना राजन कोरगावकर म्हणाले की, पेडणे मतदारसंघाच्या विकासासाठी स्थानिक समस्या, जनतेच्या गरजा आणि अपेक्षांना केंद्रस्थानी ठेवून काम करणे आवश्यक आहे.
“पेडणेचा भूमिपुत्र म्हणून या मतदारसंघातील जनतेच्या विश्वासाला पात्र ठरणे ही माझी जबाबदारी आहे. युवकांसाठी रोजगार, दर्जेदार शिक्षण, रस्ते, पाणी, आरोग्य सेवा, पर्यटन, शेती आणि स्थानिक व्यवसायांना चालना देणे ही माझी प्राधान्याची क्षेत्रे असतील,” असे त्यांनी सांगितले.
आगामी विधानसभा निवडणूक लढविण्याच्या तयारीत असल्याचे स्पष्ट करताना कोरगावकर म्हणाले की, नागरिकांचा वाढता पाठिंबा हीच आपली खरी ताकद आहे.
“पेडणेच्या विकासासाठी आणि मतदारसंघाचा आवाज विधानसभेत बुलंद करण्यासाठी आपण सर्वांनी एकत्र आले पाहिजे. तोरसेपासून संपूर्ण पेडणे मतदारसंघातील जनतेचा विश्वास मिळवत विकासाच्या मुद्द्यांवर पुढे जाणार आहे,” असे त्यांनी सांगितले.
‘भूमिपुत्राच्या नेतृत्वामागे एकत्र येण्याची वेळ’ — प्रकाश शेट्ये
माजी सरपंच प्रकाश शेट्ये यांनी कोरगावकर यांच्या नेतृत्वाला पाठिंबा देताना पेडणेच्या प्रश्नांसाठी विधानसभेत ठामपणे आवाज उठविणाऱ्या नेतृत्वाची गरज असल्याचे सांगितले.
“तोरसेतील नागरिकांनी आज आपली भूमिका स्पष्ट केली आहे. पेडणेच्या भूमिपुत्राला विधानसभेत पाठविण्यासाठी आम्ही सर्वजण एकत्र आलो आहोत. आगामी निवडणुकीत राजन कोरगावकर यांना मोठ्या मताधिक्याने विजयी करण्यासाठी एकजुटीने काम करू,” असे त्यांनी सांगितले.
महिला आणि युवा शक्ती निर्णायक ठरेल — प्रेरणा शेट्ये
माजी सरपंच प्रेरणा शेट्ये यांनी महिला आणि युवकांनी विकासाच्या प्रक्रियेत अधिक सक्रिय होण्याचे आवाहन केले.
पेडणेच्या भवितव्यासाठी योग्य नेतृत्वाची निवड महत्त्वाची असून, स्थानिक प्रश्नांना प्राधान्य देणाऱ्या नेतृत्वाच्या पाठीशी महिला, युवा आणि नागरिकांनी ताकदीने उभे राहिले पाहिजे, असे त्या म्हणाल्या.
युवकांनी विकासाच्या लढ्यात पुढे यावे — गौरेश परब
युवा सामाजिक कार्यकर्ते गौरेश परब यांनी रोजगार, शिक्षण, कौशल्यविकास आणि स्थानिक रोजगारसंधी यांसाठी युवकांनी सक्रिय भूमिका बजावण्याची गरज व्यक्त केली.
“पेडणेच्या विकासासाठी तरुणाईची ताकद एकत्र आली पाहिजे. राजन कोरगावकर यांना विधानसभेत पाठविण्यासाठी युवा वर्ग पूर्ण ताकदीने उभा राहील,” असे त्यांनी सांगितले.
‘पेडणेचा मजबूत आवाज विधानसभेत हवा’ — उपेंद्र देशप्रभू
माजी उपनगराध्यक्ष उपेंद्र देशप्रभू यांनी पेडणे मतदारसंघातील विविध विकासप्रश्नांकडे लक्ष वेधले.
स्थानिक प्रश्न प्रभावीपणे शासनापर्यंत पोहोचवण्यासाठी विधानसभेत पेडणेचा मजबूत आणि सक्षम आवाज असणे आवश्यक आहे. त्यासाठी कोरगावकर यांच्या नेतृत्वाला ताकद देण्याचे आवाहन त्यांनी केले.
गावागावांतून एकजूट उभी करू — राजू नरसे
माजी सरपंच राजू नरसे यांनी रस्ते, पाणी, रोजगार आणि मूलभूत सुविधांसाठी सातत्याने पाठपुरावा करणाऱ्या नेतृत्वाची पेडणेला गरज असल्याचे सांगितले.
“राजन कोरगावकर यांना मोठ्या मताधिक्याने विधानसभेत पाठविण्यासाठी गावागावांतून एकजूट उभी करू,” असे त्यांनी नमूद केले.
नव्या पिढीने पुढे यावे — कृष्णा पालयेकर
युवा सामाजिक कार्यकर्ते कृष्णा पालयेकर यांनी नव्या पिढीने राजकीय आणि सामाजिक प्रक्रियेत सक्रिय सहभाग घेण्याचे आवाहन केले.
पेडणेच्या तरुणांच्या अपेक्षा आणि प्रश्न शासनापर्यंत प्रभावीपणे पोहोचवण्यासाठी स्थानिक नेतृत्वाला बळ देणे आवश्यक असल्याचे त्यांनी सांगितले.
अनुभव आणि युवा शक्तीची सांगड घालूया — उत्तम परब
ज्येष्ठ नागरिक उत्तम परब यांनी ज्येष्ठांचा अनुभव आणि युवकांची ऊर्जा यांची सांगड घालत पेडणेच्या विकासासाठी सर्वांनी मतभेद बाजूला ठेवून एकत्र येण्याचे आवाहन केले.
“पेडणेच्या भूमिपुत्राला विधानसभेत पाठविण्यासाठी सर्वांनी एकजुटीने प्रयत्न करणे, हीच या कार्यक्रमाची दिशा आहे,” असे त्यांनी सांगितले.
‘विकासासाठी एकजूट हाच मार्ग’ — प्रशांत गावडे
सामाजिक कार्यकर्ते प्रशांत गावडे यांनी पेडणेच्या सर्वांगीण विकासासाठी जनतेशी जोडलेले आणि सक्षम नेतृत्व पुढे येण्याची गरज व्यक्त केली.
स्थानिक प्रश्न सोडविण्यासाठी नागरिकांची एकजूट महत्त्वाची असून, राजन कोरगावकर यांना विधानसभेत पाठविण्यासाठी सर्वांनी संघटितपणे काम करण्याचा संकल्प केला असल्याचे त्यांनी सांगितले.
तोरसेतून विधानसभा निवडणुकीचे रणशिंग?
तोरसेतील या कार्यक्रमातून आगामी विधानसभा निवडणुकीच्या दृष्टीने राजन कोरगावकर यांच्या समर्थनार्थ एकजुटीचा स्पष्ट संदेश देण्यात आला. युवा वर्ग, माजी सरपंच-पंच, सामाजिक कार्यकर्ते आणि ज्येष्ठ नागरिकांनी त्यांच्या नेतृत्वाला जाहीर पाठिंबा देत मोठ्या मताधिक्याने विधानसभेत पाठविण्याचा संकल्प केला.
कार्यक्रमाला माजी सरपंच प्रकाश शेट्ये, प्रेरणा शेट्ये, युवा सामाजिक कार्यकर्ते गौरेश परब, माजी उपनगराध्यक्ष उपेंद्र देशप्रभू, माजी सरपंच राजू नरसे, युवा सामाजिक कार्यकर्ते कृष्णा पालयेकर, ज्येष्ठ नागरिक उत्तम परब, माजी सरपंच रूपेश परब, माजी उपसरपंच गजानन गडेकर यांच्यासह तोरसे पंचायत क्षेत्रातील अनेक नागरिक उपस्थित होते.
