पणजी: आगामी विधानसभा निवडणुकांच्या पार्श्वभूमीवर गोवा विधानसभेत अनुसूचित जमाती (ST) आरक्षण तातडीने लागू करण्याची मागणी करणारे निवेदन मुख्य निवडणूक अधिकाऱ्यांना सादर करण्यात आले.

शिष्टमंडळाने निवडणूक विभाग आणि संबंधित यंत्रणांनी वेळेत आवश्यक पावले उचलून गोव्यातील ST समाजाला योग्य राजकीय प्रतिनिधित्व मिळावे, अशी मागणी केली. अनेक वर्षांपासून प्रलंबित असलेली ST आरक्षणाची मागणी आता अधिक विलंब न करता अंमलात आणावी, असे निवेदनात नमूद करण्यात आले आहे.

निवेदनात म्हटले आहे की, ST आरक्षण विधेयकाला राष्ट्रपतींची मंजुरी मिळालेली असून, हा टप्पा भाजपच्या राज्य आणि केंद्र सरकारच्या प्रयत्नांमुळे साध्य झाला आहे. कायदेशीर प्रक्रिया पूर्ण झाल्याने आता आगामी निवडणुकांपूर्वी प्रत्यक्ष अंमलबजावणीवर भर देणे आवश्यक असल्याचे शिष्टमंडळाने स्पष्ट केले.

तसेच अनुसूचित जमाती समाजाच्या घटनात्मक हक्कांचे संरक्षण आणि विधानसभेत न्याय्य प्रतिनिधित्व सुनिश्चित करणे ही लोकशाहीसाठी अत्यंत महत्त्वाची बाब असल्याचेही निवेदनात नमूद करण्यात आले.

आगामी निवडणुकांपूर्वी आरक्षण प्रक्रिया पूर्ण करण्यासाठी संबंधित विभागांशी समन्वय साधून तातडीने कारवाई करावी, अशी मागणी शिष्टमंडळाने मुख्य निवडणूक अधिकाऱ्यांकडे केली.

हे निवेदन सामाजिक न्याय, लोकशाही सहभाग आणि सर्वसमावेशक प्रतिनिधित्वासाठी असल्याचे शिष्टमंडळाने सांगितले.