सरपंच सुबोध महाले यांचे पोलिसांना पत्र
—————————-
गांवकारी, दि. ११ (प्रतिनिधी) : पेडणे तालुक्यातील उगवे गावात तेरेखोल नदीपात्रातून सुरू असलेल्या कथित बेकायदा रेती उपशाविरोधात तांबोसे-मोपा-उगवे ग्रामपंचायतीने आक्रमक भूमिका घेतली आहे. या प्रकाराला तातडीने आळा घालण्यासाठी कठोर कारवाई करावी, अशी मागणी सरपंच सुबोध महाले यांनी पेडणे पोलिसांकडे केली आहे.

सरपंच महाले यांनी ९ नोव्हेंबर २०२६ रोजी पेडणे पोलिस निरीक्षक तथा उत्तर गोवा पोलिस अधिक्षकांना लेखी पत्र पाठवून उगवे परिसरातील तेरेखोल नदीपात्रातून बेकायदेशीरपणे रेती उपसा केला जात असल्याचे निदर्शनास आणून दिले आहे. ग्रामपंचायतीचा या बेकायदा प्रकाराला तीव्र विरोध असून संबंधित अधिकाऱ्यांकडे यापूर्वीही अनेकदा निवेदने सादर करण्यात आल्याचे पत्रात नमूद करण्यात आले आहे.

उगवे गावातील नदीपात्राची प्रत्यक्ष पाहणी करून सर्वेक्षण करण्यात यावे. तसेच बेकायदा रेती उपसा रोखण्यासाठी नदीकिनारी नियमितपणे दिवसरात्र पोलिस गस्त घालण्यात यावी, अशी मागणी सरपंचांनी केली आहे.

विशेषतः रात्रीच्या वेळी होणाऱ्या कथित अवैध रेती उपशावर नियंत्रण ठेवण्यासाठी नदीकिनारी किनारी पोलिस दलाचे कर्मचारी किंवा सुरक्षा रक्षक तैनात करण्याची विनंतीही करण्यात आली आहे.

बेकायदा रेती उपशाच्या प्रकारांना आळा घालण्यासाठी पोलिसांनी तातडीने आवश्यक उपाययोजना कराव्यात आणि भविष्यात असे प्रकार घडणार नाहीत याची दक्षता घ्यावी, असे सरपंच महाले यांनी पत्रात म्हटले आहे.