साखळीकर सहभागी होणार नाहीत: मुख्यमंत्री

गांवकारी, दि. २ (प्रतिनिधी)

काँग्रेस पक्षाच्या गोंय राखण यात्रेचे ढोल, ताशे आज मुख्यमंत्री डॉ. प्रमोद सावंत यांच्या साखळी मतदारसंघात वाजणार आहेत. तत्पूर्वी मुख्यमंत्री डॉ. सावंत यांनी या यात्रेत साखळीकर सहभागी होणार नाहीत,असा टोला हाणला असून साखळीतील यात्रा यशस्वी करण्याचे आव्हान काँग्रेससमोर उभे ठाकले आहे.
काँग्रेसच्या साखळी मतदारसंघातील यात्रेत सहभागी होण्यासाठी अखिल भारतीय काँग्रेसचे सरचिटणीस सचिन पायलट हजर राहणार आहेत. काँग्रेसने आपल्या संपूर्ण यात्रेत आणि प्रचारात मुख्यमंत्री डॉ. सावंत यांना लक्ष्य केल्यामुळे साखळीतील या यात्रेकडे सर्वांचे लक्ष लागून राहीले आहे. साखळी मतदारसंघातील काँग्रेसच्या यात्रेच्या पार्श्वभूमीवर पक्षाचे पोस्टर आणि प्रचार साहित्य फाडण्यात आल्याचा आरोप काँग्रेसने केल्याने राजकीय वातावरण तापले आहे.
भाजपने पोस्टर-बॅनरवर लक्ष केंद्रित करण्याऐवजी रोजगार, जमीन संरक्षण, विकास, अमली पदार्थ, महागाई तसेच गोव्याची अस्मिता आणि साधनसंपत्तीच्या प्रश्नांवर चर्चा करावी, असे आव्हान काँग्रेस नेत्यांनी केले आहे.