नगर नियोजन विभागाकडून तांत्रिक परवाना मागे

गांवकारी, दि. १४ (प्रतिनिधी)

बार्देश तालुक्यातील साल्वादोर दो मुंद पंचायत क्षेत्रातील एकोशी येथे नियोजित निवासी प्रकल्पासाठी मिळालेली तांत्रिक मंजुरी अखेर नगर नियोजन विभागाने रद्द केली आहे. सुप्रसिद्ध फॅशन डिझायनर तरुण तेहलानी यांच्या या प्रकल्पाला सर्वोच्च न्यायालयाच्या निर्देशांनंतर मोठा धक्का बसला आहे.
३ फेब्रुवारी २०२३ रोजी या प्रकल्पाला “पास्ट कमिटमेंट” तरतुदींवर आधारित मंजुरी देण्यात आली होती. मात्र सामाजिक कार्यकर्ते धिरेंद्र फडते व इतरांनी या मंजुरीविरोधात सातत्याने तक्रारी दाखल केल्या. मुंबई उच्च न्यायालयाने याचिका फेटाळल्यानंतर त्यांनी सर्वोच्च न्यायालयात धाव घेतली. सर्वोच्च न्यायालयाने प्रादेशिक आराखडा २०२१ लागू करण्याचे स्पष्ट निर्देश दिल्यानंतर पंचायतीने कामबंदची नोटीस जारी केली होती.
उत्तर गोवा जिल्हा नगर नियोजन कार्यालयाने ५ मे २०२६ रोजी जारी केलेल्या आदेशानुसार, सर्व्हे क्रमांक २९२/१-एल-७ येथील निवासी घराचे सुधारित बांधकाम, स्टाफ क्वार्टर्स, स्विमिंग पूल व कंपाऊंड वॉल यासाठी दिलेली मंजुरी रद्द करण्यात आली आहे.
या निर्णयामुळे “पास्ट कमिटमेंट” तरतुदींवरून पुन्हा एकदा वाद निर्माण होण्याची शक्यता आहे. तरुण तेहलानी यांच्या प्रकल्पाला मोठा धक्का बसला असून, सामाजिक कार्यकर्त्यांनी केलेल्या सातत्यपूर्ण पाठपुराव्यामुळे गावांतून त्यांचे कौतुक होत आहे.