पश्चिम बंगाल सभापतींच्या गोवा भेटीचे रहस्य उघड

गावंकारी, दि. २५ (प्रतिनिधी)

पश्चिम बंगाल विधानसभेचे सभापती रथिंद्र बोस यांच्या आर. बोस हॉस्पिटॅलिटी मॅनेजमेंट प्रा. लि. कंपनीतर्फे पाळोळे-काणकोण येथील सर्व्हे क्रमांक १४८/६ मधील ४८८ चौ. मी. जमीन ओलीत क्षेत्रातून सेटलमेंट क्षेत्रात रूपांतरित करण्यासाठी कलम ३९(ए) अंतर्गत अर्ज करण्यात आला आहे. हा अर्ज संतोष सांगेलकर यांच्या नावे सादर करण्यात आला आहे.
रथिंद्र बोस यांनी नुकतीच गोवा भेट देऊन मुख्यमंत्री डॉ. प्रमोद सावंत, नगर नियोजनमंत्री विश्वजीत राणे आणि सभापती डॉ. गणेश गावकर यांची भेट घेतली होती. पाळोळे येथील कथित अनधिकृत बांधकामाचा विषय मार्गी लावण्यासाठीच ही भेट असल्याची चर्चा होती. आता ३९(ए) अंतर्गत अर्ज दाखल झाल्याने या चर्चेला पुष्टी मिळाल्याचे बोलले जात आहे.
देवबाग-पाळोळे येथे कंपनीने भातशेतीच्या जमिनीत आवश्यक परवानग्या व रूपांतरण सनद न घेता व्यावसायिक इमारत उभारल्याचा आरोप आहे. तसेच जलसंपदा खात्याच्या सिंचनासाठी संपादित जमिनीवर अतिक्रमण करून नाला तोडल्याचा आरोपही आहे. बांधकामामुळे पावसाळी नाले अडवल्याने शेतांमध्ये पाणी शिरून नुकसान होत असल्याचे स्थानिकांचे म्हणणे आहे.
काणकोण पालिकेने बांधकाम पाडण्याचे आदेश दिले असतानाही अद्याप कारवाई झालेली नाही. नगर नियोजन विभागानेही बांधकामास मंजुरी तसेच नियमितीकरणास विरोध दर्शविला आहे. दरम्यान, बांधकाम कायदेशीर करण्यासाठी कंपनीने जिल्हाधिकाऱ्यांकडे पत्रव्यवहार केला असून, त्यानुसार काणकोण उपजिल्हाधिकाऱ्यांना आवश्यक कार्यवाहीचे निर्देश देण्यात आले आहेत.