पणजी : भारतीय क्रिकेट नियामक मंडळाच्या (बीसीसीआय) मुंबई येथे १८ सप्टेंबर २०२६ रोजी होणाऱ्या वार्षिक सर्वसाधारण सभेत (एजीएम) गोवा क्रिकेट असोसिएशनचे प्रतिनिधित्व करण्याची जबाबदारी अनुभवी क्रिकेट प्रशासक विनोद (बाळू) फडके यांच्यावर सोपविण्यात आली आहे.

गोवा क्रिकेट असोसिएशनने फडके यांची अधिकृत प्रतिनिधी म्हणून नियुक्ती केली असून, राज्यातील क्रिकेटच्या विकासासाठी त्यांनी दिलेले दीर्घकालीन योगदान, प्रशासनातील अनुभव आणि खेळाविषयीची सखोल जाण लक्षात घेऊन त्यांच्यावर हा विश्वास टाकण्यात आला आहे.

गेल्या अनेक वर्षांपासून जीसीएच्या कामकाजात सक्रिय भूमिका बजावताना फडके यांनी गोवा क्रिकेटच्या विविध स्तरांवरील विकासासाठी महत्त्वपूर्ण योगदान दिले आहे. राष्ट्रीय स्तरावरील महत्त्वाच्या व्यासपीठावर गोव्याच्या क्रिकेटविषयक हिताचे मुद्दे प्रभावीपणे मांडण्याची त्यांच्यात क्षमता असल्याचा विश्वास जीसीएने व्यक्त केला आहे.

जीसीएचे अध्यक्ष महेश देसाई, सचिव तुळशीदास शेट्ये, खजिनदार अब्दुल माजिद तसेच संपूर्ण व्यवस्थापन समितीने फडके यांचे अभिनंदन करून त्यांना शुभेच्छा दिल्या आहेत.

यावेळी जीसीएचे अध्यक्ष आणि माजी रणजीपटू महेश देसाई म्हणाले, “विनोद फडके यांनी गोवा क्रिकेट असोसिएशन आणि राज्यातील क्रिकेटच्या प्रगतीसाठी सातत्याने महत्त्वपूर्ण योगदान दिले आहे. जीसीएसोबतचा त्यांचा प्रदीर्घ संबंध, अनुभव आणि समर्पण पाहता बीसीसीआयच्या एजीएममध्ये गोव्याचे प्रतिनिधित्व करण्यासाठी ते योग्य व्यक्ती आहेत.”

“गोवा क्रिकेटच्या हिताचे प्रश्न आणि आवश्यक मुद्दे ते राष्ट्रीय पातळीवर प्रभावीपणे मांडतील, तसेच ही जबाबदारी पूर्ण बांधिलकीने पार पाडतील, असा आम्हाला विश्वास आहे. संपूर्ण जीसीएच्या वतीने त्यांचे अभिनंदन करून पुढील वाटचालीसाठी मनःपूर्वक शुभेच्छा,” असेही देसाई यांनी म्हटले.