गोव्यात सध्या नोकरीसाठी रोख देण्याच्या प्रकरणांमध्ये बरीच वाढ होत असल्याने तो चिंतेचा विषय ठरला आहे. अनेक बेरोजगार तरूण सरकारी नोकरीच्या आशेने या तथाकथित दलालांच्या जाळ्यात अडकून लाखो रूपयांना गंडवले गेले आहेत.

ही परिस्थिती तरूणाईसाठी अत्यंत घातक ठरली आहे. सरकारी नोकऱ्यांसाठी गुणवत्ता किंवा पात्रता याचा काहीच संबंध नसतो तर केवळ पैशांच्या देवाणघेवाणीतूनच ती मिळू शकते, असाच संदेश यातून निघत आहे. गरीब तरूणाईसाठी तर हे प्रकार निराशाजनकच म्हणावे लागतील. पैशांची कडकी आणि त्यात राजकीय हीतसंबंध नसल्यामुळे आपल्याला या राज्यात भवितव्यच नाही, असा चुकीचा संदेश पोहचू शकतो.

एक गोष्ट आपण मान्य करायला हवी की प्रत्येकाला सरकारी नोकरी मिळू शकत नाही, परंतु याचा अर्थ फक्त काही प्रभावी लोकांनाच ती मिळण्याचा अधिकार आहे, असेही होता नये. खाजगी क्षेत्रातही तरूणाई आपले भवितव्य घडवू शकते आणि ते अनेकांनी सिद्ध करून दाखवले आहे. हा संदेश तरूणांपर्यंत पोहचवण्याची गरज आहे. सरकारने ताबडतोब सरकारी नोकर भरतीसंबंधीची विश्वासाहर्ता जपण्यासाठी पाऊले उचलण्याची गरज आहे. भरती प्रक्रियेत पारदर्शकता आणि गुणवत्ता सुनिश्चित करण्याची गरज आहे.

सरकारने कर्मचारी निवड प्रक्रियेत कोणत्याही प्रकारची त्रुटी होऊ नये याची काळजी घेतली पाहिजे. मुख्यमंत्री आणि संबंधित अधिकारी ही प्रक्रिया त्वरित आणि काटेकोरपणे अंमलात आणतील याची खात्री करावी. आधुनिक तंत्रज्ञानाचा वापर करून ही प्रक्रिया अधिक पारदर्शक करता येईल. उदाहरणार्थ, ऑनलाईन परीक्षा घेणे, स्वयंचलित मूल्यांकन प्रणाली लागू करणे, आणि अर्जदारांना रिअल-टाइम माहिती देणे. तसेच, दलालांवर कठोर कारवाई करणे आणि दोषींना कायदेशीर शिक्षेसाठी उत्तरदायी धरले पाहिजे.

युवा पिढीनेही या समस्यांचा सामना करण्यासाठी एकत्रितपणे पाऊल उचलली पाहिजेत. भ्रष्ट प्रथा उघड करणारी जनजागृती मोहिम राबवून आणि सरकारकडे जबाबदारीची मागणी करून, ते अशा फसव्या यंत्रणा थांबवू शकतात.

याशिवाय, तरुणांनी गोव्याच्या जमिनींच्या रूपांतरणाच्या (land conversion) आणि पर्यावरणीय हानीच्या मुद्द्यांवरही आवाज उठवला पाहिजे. गोव्यात मोठ्या प्रमाणावर शेती आणि जंगलांची भूमी शहरी विकासासाठी रूपांतरित केली जात आहे. बिल्डर आणि परप्रांतीय लोक मोठ्या प्रमाणावर जमीन खरेदी करत आहेत, ज्यामुळे जमिनींच्या किमती गगनाला भिडल्या आहेत आणि स्थानिक लोकांसाठी ती परवडणारी राहिली नाही.

ही प्रवृत्ती गोव्याच्या सांस्कृतिक आणि सामाजिक अस्तित्वावर परिणाम करते, तसेच पर्यावरणीय समतोलही बिघडवते. जंगलतोड आणि शेतीचा नाश यामुळे जैवविविधतेचा ऱ्हास, पर्यावरणीय हानी, आणि नैसर्गिक संसाधनांवर अवलंबून असलेल्या लोकांच्या उपजीविकेवर परिणाम होतो.

युवकांनी या मुद्द्यांवर उभं राहून ठोस भूमिका घ्यायला हवी. बेकायदेशीर जमिनींच्या रूपांतरणाविरोधात बोलणे, शाश्वत विकास धोरणांची मागणी करणे, आणि गोव्याच्या नैसर्गिक संपत्तीचे जतन करण्यासाठी प्रयत्न करणे ही त्यांची जबाबदारी आहे.

भ्रष्टाचार, जमीन रूपांतरण आणि पर्यावरणीय नाश या सर्व समस्या एकमेकांशी संबंधित आहेत आणि गोव्याच्या भविष्यासाठी धोकादायक ठरू शकतात. युवा पिढीने या समस्यांवर आवाज उठवून न्याय, टिकाव आणि गुणवत्तेला प्राधान्य देण्याची मागणी केली पाहिजे. गोव्याच्या भविष्याचे स्वरूप ठरविण्यासाठी त्यांचा सक्रिय सहभाग आणि दृढनिश्‍चय महत्त्वाचा आहे.

गौरिश काशिनाथ गावस,
व्यावसायिक
वाळपई गोवा