पणजी, दि. २९: वटपौर्णिमेच्या पावन पर्वानिमित्त मुख्यमंत्री डॉ. प्रमोद सावंत यांच्या हस्ते सोमवारी राज्यव्यापी वटवृक्ष लागवड मोहिमेचा शुभारंभ होणार आहे. हा कार्यक्रम सकाळी १० वाजता दिवाडीतील श्री भाविका देवी कोटारेश्वर देवस्थान, वंजुवे (मळार, दिवाडी) येथे आयोजित करण्यात आला आहे.

ही मोहीम पंतप्रधान नरेंद्र मोदी यांच्या “एक पेड माँ के नाम” या उपक्रमाचा भाग असून, राज्यभर मोठ्या प्रमाणावर वडाची झाडे लावून पर्यावरण संवर्धनाला चालना देण्याचा सरकारचा उद्देश आहे. वटपौर्णिमेच्या निमित्ताने नागरिकांनीही वडाचे झाड लावून त्याचे संगोपन करण्याचे आवाहन करण्यात आले आहे.

मुख्यमंत्री डॉ. सावंत यांनी यापूर्वी जाहीर केलेल्या ‘हरित गोवा, स्वच्छ गोवा’ अभियानाअंतर्गत राज्यात मोठ्या प्रमाणावर वृक्षलागवड करण्याचा संकल्प करण्यात आला असून, ही वटवृक्ष लागवड मोहीम त्या व्यापक पर्यावरण उपक्रमाचा महत्त्वाचा भाग असल्याचे सांगितले जात आहे.