*_सत्तेत आज आहात, मग रोजगारासाठी २०२७ पर्यंत थांबायचे कशाला?_*

राष्ट्रध्वजाच्या भावनिक मुद्द्याआड बेरोजगारीचा प्रश्न दडपण्याचा प्रयत्न : विश्वासराव राणे

वाळपई, दि.१६:

गोव्यातील बेरोजगार युवकांना सरकारी नोकऱ्यांची वारंवार आश्वासने देऊनही प्रत्यक्षात रोजगाराच्या संधी उपलब्ध करून देण्यात सरकार अपयशी ठरले आहे. आता वाढत्या बेरोजगारीवर युवकांकडून प्रश्न विचारले जात असताना राष्ट्रध्वजाचा भावनिक मुद्दा पुढे करून त्यांचे लक्ष विचलित करण्याचा आणि ‘२०२७ मध्ये भाजपचे सरकार आल्यास सरकारी नोकऱ्या देऊ’ असे नवे आश्वासन देण्याचा प्रयत्न सुरू असल्याचा जोरदार आरोप विश्वासराव राणे यांनी केला आहे.

“संबंधित मंत्री आजही भाजप सरकारचाच भाग आहेत. मग युवकांना नोकऱ्यांसाठी २०२७ पर्यंत का थांबावे लागणार? आज सत्तेत असताना जी आश्वासने पूर्ण करता येऊ शकतात, ती निवडणुकीनंतर पूर्ण करण्याची भाषा का केली जात आहे?” असा थेट सवाल राणे यांनी आपल्या प्रसिद्धीपत्रकातून उपस्थित केला आहे.

गोव्यातील युवकांना आता आणखी मुदती आणि आश्वासने नकोत, तर नोकऱ्या, रोजगाराच्या संधी आणि सरकारची जबाबदारी निश्चित करणारी उत्तरे हवी आहेत, असे त्यांनी स्पष्ट केले.

‘सरकार अपयशी असेल तर मंत्रीही जबाबदार’

राणे यांनी मंत्र्यांच्या भूमिकेतील विरोधाभासावरही बोट ठेवले. सध्याचे सरकार रोजगारनिर्मितीत अपयशी ठरले आहे, असे मंत्र्यांना वाटत असेल तर त्या सरकारचा एक भाग म्हणून स्वतःची जबाबदारी किती, याचे उत्तरही त्यांनी जनतेला द्यावे. एका बाजूला विद्यमान परिस्थितीची जबाबदारी मुख्यमंत्र्यांकडे ढकलायची आणि दुसऱ्या बाजूला भविष्यातील नोकऱ्यांचे श्रेय स्वतः घेण्याचा प्रयत्न करायचा, हे स्वीकारता येणार नाही, असे त्यांनी म्हटले.

‘राष्ट्रध्वजाचा राजकीय ढाल म्हणून वापर नको’

राष्ट्रध्वज हा प्रत्येक भारतीयाचा आहे. बेरोजगारी आणि सरकारच्या कारभारावरील प्रश्नांपासून लक्ष दुसरीकडे वळवण्यासाठी राष्ट्रध्वज किंवा राष्ट्रीय भावनांचा राजकीय साधन म्हणून वापर होऊ नये, अशी स्पष्ट भूमिका राणे यांनी मांडली.

गोव्यातील तरुणांना भावनिक प्रतीकांच्या माध्यमातून किंवा भविष्यातील आश्वासनांच्या आधारे मूळ प्रश्नांपासून दूर नेता येणार नाही. आज रोजगार मागणाऱ्या युवकांना २०२७ ची तारीख दाखवणे म्हणजे त्यांच्या प्रश्नाचे उत्तर नव्हे, असेही त्यांनी म्हटले.

“गोव्याच्या युवकांची मागणी अत्यंत स्पष्ट आहे—नोकऱ्या द्या, संधी द्या आणि सत्तेत असलेल्यांनी आपल्या कारभाराची जबाबदारी स्वीकारा. आज दिलेली आश्वासने २०२७ पर्यंत पुढे ढकलता येणार नाहीत. युवकांना ‘डिलिव्हरी’ हवी आहे, ‘डायव्हर्जन’ नाही,” असा घणाघात विश्वासराव राणे यांनी केला.