गांवकारी, दि. ४ (प्रतिनिधी)

सरकारी, कोमुनिदाद तसेच खाजगी जमिनीवरील बेकायदा आणि अनधिकृत बांधकामे नियमित करण्यासाठी विविध कायद्यात दुरुस्ती करून तयार करण्यात आलेल्या ‘म्हजें घर’ योजनेचा शुभारंभ आज केंद्रीय गृहमंत्री अमित शहा यांच्या हस्ते होणार आहे.
दोनापावला येथील डॉ. श्यामा प्रसाद मुखर्जी इनडोअर स्टेडियममध्ये या कार्यक्रमाचे आयोजन करण्यात आले आहे. राज्यभरातून सुमारे २० हजार कार्यकर्त्यांना आणण्याचे लक्ष्य भाजपने ठेवले आहे. या निमित्ताने राज्यातील सुमारे १८ प्रकल्पांची पायाभरणी व उद्घाटन शहा यांच्या हस्ते होणार आहे.
‘म्हजें घर’ ही योजना आगामी २०२७ च्या विधानसभा निवडणुकीत भाजपसाठी गेमचेंजर ठरणार असल्यामुळे मुख्यमंत्री डॉ. प्रमोद सावंत यांनी या महत्त्वाकांक्षी योजनेचा जोरदार पुरस्कार केला आहे. या कायद्यांना न्यायालयात आव्हान दिले जाण्याची शक्यता असली तरी त्याला तोंड देण्यासाठी सरकारने जय्यत तयारी केली आहे.

अरविंद केजरीवाल गोव्यात दाखल
एकीकडे अमित शहा यांचे गोव्यात आगमन होण्यापूर्वीच ‘आप’चे नेते अरविंद केजरीवाल गोव्यात दाखल झाले आहेत. विमानतळावर उतरल्यावर त्यांनी भाजप आणि काँग्रेसवर टीका केली. या दोन्ही पक्षांनी गेल्या १३ वर्षांत गोव्यात एकमेकांना सांभाळून कारभार केला आहे, असा आरोप त्यांनी केला.
आगामी विधानसभा निवडणुकीत ‘आप’ स्वबळावर सरकार स्थापन करणार असल्याचेही त्यांनी स्पष्ट केले. काँग्रेस आणि भाजप एकत्रितपणे काम करत आहेत, असा आरोपही त्यांनी केला. आपल्या दोन दिवसांच्या दौऱ्यात ते ठिकठिकाणी ‘आप’ची कार्यालये सुरू करणार असून कार्यकर्त्यांशी संवाद साधणार आहेत.