पणजी, २१ जुलै : गोव्याच्या राजकारणात महत्त्वाची घडामोड घडत आम आदमी पार्टी (आप)चे माजी गोवा राज्य संयोजक राहुल म्हांबरे यांनी मंगळवारी भारतीय राष्ट्रीय काँग्रेसमध्ये अधिकृत प्रवेश केला. पणजी येथील काँग्रेस भवनात आयोजित कार्यक्रमात गोवा प्रदेश काँग्रेस समितीच्या वरिष्ठ नेत्यांच्या उपस्थितीत त्यांचा पक्षप्रवेश सोहळा पार पडला.

गोवा प्रदेश काँग्रेस समितीचे अध्यक्ष गिरीश चोडणकर यांनी राहुल म्हांबरे यांचा सदस्यत्व अर्ज स्वीकारून त्यांचे पक्षात स्वागत केले. कार्याध्यक्ष अॅड. कार्लोस आल्वारीस फेरेरा यांनी पुष्पगुच्छ देऊन त्यांचे अभिनंदन केले, तर उपाध्यक्ष डॉ. प्रमोद साळगावकर यांनी काँग्रेसचा ध्वज देऊन त्यांच्या प्रवेशाचे औपचारिक स्वागत केले.

यावेळी बोलताना गिरीश चोडणकर म्हणाले की, लोकशाही, संविधानिक मूल्ये आणि जनहिताच्या राजकारणावर विश्वास असलेल्या व्यक्तींसाठी काँग्रेस हा नैसर्गिक पर्याय ठरत आहे. राहुल म्हांबरे यांचा जनसंपर्क, संघटनात्मक अनुभव आणि लोकहितासाठीची बांधिलकी काँग्रेसला अधिक बळकटी देईल, असा विश्वास त्यांनी व्यक्त केला.

कार्याध्यक्ष अॅड. कार्लोस आल्वारीस फेरेरा यांनी सांगितले की, संविधानिक मूल्ये, धर्मनिरपेक्षता आणि जनसेवेवर विश्वास ठेवणाऱ्या प्रत्येकाचे काँग्रेसमध्ये स्वागत आहे. राहुल म्हांबरे यांच्या प्रवेशामुळे पक्ष संघटना अधिक सक्षम होईल आणि पारदर्शक, जबाबदार व जनहितैषी प्रशासनासाठी पक्ष अधिक प्रभावीपणे काम करेल, असे ते म्हणाले.

पक्षप्रवेशानंतर राहुल म्हांबरे यांनी आपल्या मनोगतात सांगितले की, भारतीय राष्ट्रीय काँग्रेसने देशाच्या जडणघडणीत ऐतिहासिक योगदान दिले असून, सखोल विचारांती त्यांनी पक्षात प्रवेश करण्याचा निर्णय घेतला आहे. लोकशाहीचे संरक्षण, गोव्याची ओळख व अस्मिता जपणे आणि जनतेच्या मूलभूत प्रश्नांना न्याय देण्याची क्षमता काँग्रेसमध्येच असल्याचा आपला ठाम विश्वास असल्याचे त्यांनी सांगितले.

“प्रदेशाध्यक्ष गिरीश चोडणकर आणि पक्षाच्या वरिष्ठ नेतृत्वाने माझ्यावर दाखविलेल्या विश्वासाबद्दल मी त्यांचा आभारी आहे. काँग्रेसची संघटना तळागाळात अधिक मजबूत करण्यासाठी, समविचारी नागरिकांना एकत्र आणण्यासाठी आणि प्रत्येक गोमंतकीयाच्या हक्कांसाठी व उज्ज्वल भविष्यासाठी मी पूर्ण ताकदीने कार्य करेन,” असेही राहुल म्हांबरे यांनी स्पष्ट केले.

कार्यक्रमाची सुरुवात उत्तर गोवा जिल्हाध्यक्ष अॅड. शशांक नार्वेकर यांच्या स्वागतपर भाषणाने झाली. त्यानंतर उपाध्यक्ष तुलिओ डिसोझा, डॉ. प्रमोद साळगावकर आणि मीडिया व कम्युनिकेशन विभागाचे अध्यक्ष अमरनाथ पंजीकर यांनी उपस्थितांना संबोधित केले. काँग्रेस संघटना अधिक मजबूत करण्यासाठी, लोकशाही मूल्यांचे रक्षण करण्यासाठी आणि गोव्याच्या प्रगतीसाठी एकजुटीने कार्य करण्याचे आवाहन त्यांनी केले.

या कार्यक्रमाला उपाध्यक्ष तुलिओ डिसोझा, उपाध्यक्ष डॉ. प्रमोद साळगावकर, कार्याध्यक्ष अॅड. कार्लोस आल्वारीस फेरेरा, सरचिटणीस प्रदीप नाईक, युवक काँग्रेसचे प्रभारी जनार्दन भंडारी, गोवा युवक काँग्रेसचे अध्यक्ष अॅड. अर्चित नाईक, प्रवक्ते महेश म्हांबरे व समील व्होल्वोईकर, जिल्हाध्यक्ष अॅड. शशांक नार्वेकर व मंगलदास नाईक, सलमान खान, नोनू नाईक तसेच काँग्रेसचे पदाधिकारी, युवक काँग्रेसचे कार्यकर्ते आणि मोठ्या संख्येने समर्थक उपस्थित होते.

कार्यक्रमाचे सूत्रसंचालन प्रदीप नाईक यांनी केले, तर महेश म्हांबरे यांनी आभार प्रदर्शन केले.

राहुल म्हांबरे यांच्या पक्षप्रवेशामुळे गोवा प्रदेश काँग्रेसची संघटनात्मक ताकद आणखी वाढेल आणि पारदर्शक प्रशासन, सामाजिक न्याय तसेच गोव्याची अस्मिता जपण्यासाठी पक्षाची जनआधारित चळवळ अधिक व्यापक होईल, असा विश्वास काँग्रेसच्या नेत्यांनी यावेळी व्यक्त केला.