पणजी, ३१ ऑक्टोबर (प्रतिनिधी) : कथित मतचोरी, निवडणूक प्रक्रियेतील गैरप्रकार आणि लोकशाही संस्थांच्या गैरवापराविरोधात काँग्रेसतर्फे १ नोव्हेंबर रोजी नवी दिल्लीतील ऐतिहासिक रामलीला मैदानावर आयोजित करण्यात आलेल्या ‘चलो दिल्ली’ महामोर्चात सहभागी होण्यासाठी गोवा प्रदेश काँग्रेस समितीचे ६० सदस्यीय शिष्टमंडळ दिल्लीत दाखल झाले आहे. प्रदेश काँग्रेस अध्यक्ष गिरीश चोडणकर यांच्या नेतृत्वाखाली हे शिष्टमंडळ आंदोलनात सहभागी होणार आहे.

 

देशातील निवडणूक प्रक्रियेची पारदर्शकता, मतदारांच्या घटनात्मक अधिकारांचे संरक्षण आणि लोकशाही संस्थांची विश्वासार्हता या मुद्द्यांवर काँग्रेसने देशव्यापी आंदोलनाची हाक दिली आहे. ‘मतचोरी थांबवा, लोकशाही वाचवा आणि संविधानाचे रक्षण करा’ या घोषणांसह आयोजित महामोर्चात देशभरातील काँग्रेस नेते, पदाधिकारी आणि कार्यकर्ते मोठ्या संख्येने सहभागी होणार असल्याचे पक्षाने प्रसिद्धीपत्रकात म्हटले आहे.

गोव्यातून दिल्लीला गेलेल्या शिष्टमंडळात प्रदेशाध्यक्ष गिरीश चोडणकर, विरोधी पक्षनेते युरी आलेमाव, कार्याध्यक्ष तथा आमदार एल्टन डिकॉस्टा, दक्षिण गोव्याचे खासदार कॅप्टन विरियातो फर्नांडिस, कार्याध्यक्ष सुनील कवठणकर, महिला काँग्रेस अध्यक्षा डॉ. प्रतीक्षा खलप, प्रदेश युवक काँग्रेस अध्यक्ष ॲड. अर्चित नाईक, सेवादलाचे मुख्य संघटक राजन घाटे यांचा समावेश आहे.

तसेच सोशल मीडिया विभागाचे अध्यक्ष हिमांशू तिवरेकर, ओबीसी विभागाचे अध्यक्ष शरद चोपडेकर, अल्पसंख्याक विभागाचे अध्यक्ष नाझीर खान, जवाहर बाल मंचच्या गोवा अध्यक्षा जिना परेरा, किसान काँग्रेस अध्यक्ष संजय बार्दे, प्रवक्ते समील वळवईकर, जिल्हाध्यक्ष राजेश वेरेकर, सरचिटणीस एव्हरसन वालेस, माजी जिल्हाध्यक्ष सावियो डिसिल्वा आणि सरचिटणीस मोरेनो रिबेलो हेही आंदोलनात सहभागी होणार आहेत.

याशिवाय युवक काँग्रेस प्रभारी जना भंडारी, प्रवक्ते विवेक डिसिल्वा, ॲड. अमित पालेकर, सरचिटणीस ॲड. वरद मर्दोळकर, ॲड. जितेंद्र गावकर, ज्येष्ठ अल्पसंख्याक काँग्रेस नेते शेख हसन मन्सूर यांच्यासह अन्य पदाधिकारी आणि कार्यकर्त्यांचा शिष्टमंडळात समावेश आहे.

मतदारांच्या अधिकारांसाठी देशव्यापी आंदोलन

निवडणूक प्रक्रियेत कथित गैरप्रकार होत असल्याचा आरोप काँग्रेसने केला असून, प्रत्येक नागरिकाच्या मताचा आदर राखला गेला पाहिजे, अशी पक्षाची भूमिका आहे. निवडणूक प्रक्रियेत पारदर्शकता, जबाबदारी आणि आवश्यक संरक्षणात्मक उपाययोजना सुनिश्चित करण्याची मागणी या महामोर्चातून करण्यात येणार आहे.

लोकशाही व्यवस्थेत जनतेचा कौल सर्वोच्च असून, मतदारांच्या अधिकारांशी कोणतीही तडजोड स्वीकारली जाणार नाही, असे काँग्रेसने स्पष्ट केले आहे.

राष्ट्रीय नेतृत्वासोबत गोवा काँग्रेस

गोव्यातून ६० पदाधिकारी आणि कार्यकर्त्यांचा सहभाग हा राष्ट्रीय नेतृत्वासोबत एकजुटीने उभे राहण्याचा पक्षाचा निर्धार दर्शवित असल्याचे प्रदेश काँग्रेसने म्हटले आहे.

दिल्लीतील रामलीला मैदानावर देशभरातून लाखो काँग्रेस कार्यकर्ते सहभागी होण्याची अपेक्षा पक्षाने व्यक्त केली आहे. लोकशाही आणि संविधानाच्या संरक्षणासाठी काँग्रेसचा संघर्ष सुरूच राहणार असल्याचे प्रसिद्धीपत्रकात नमूद करण्यात आले आहे.

‘आमचे मत, आमचा अधिकार’, ‘मतचोरी थांबवा’ आणि ‘लोकशाही वाचवा, संविधान वाचवा’ या घोषणांच्या माध्यमातून महामोर्चात केंद्र सरकारविरोधात आवाज उठविण्यात येणार असल्याचे गोवा प्रदेश काँग्रेस समितीने स्पष्ट केले आहे.