प्रदेश समिती आणि राज्य कार्यकारिणीची संयुक्त बैठक

गांवकारी,दि.४ (प्रतिनिधी)

विरोधी पक्षनेते युरी आलेमाव यांनी घोषित केलेल्या गोंय राखण यात्रेसाठी गोवा प्रदेश काँग्रेस सज्ज बनली आहे. काँग्रेस समिती आणि राज्य कार्यकारिणीच्या संयुक्त बैठकीत तयारीचा आढावा घेण्यात आला. प्रदेशाध्यक्ष गिरीश चोडणकर यांच्या अध्यक्षतेखाली पार पडलेल्या या बैठकीला विरोधी पक्षनेते युरी आलेमाव, माजी केंद्रीय मंत्री एदूआर्द फालेरो, कार्याध्यक्ष एम. के. शेख व सुनील कवठणकर, कोषाध्यक्ष दत्ता नाईक तसेच पक्षाचे पदाधिकारी व राज्य कार्यकारिणी सदस्य उपस्थित होते.

बैठकीत संघटन बळकटीकरण, लोकशाही हक्कांचे संरक्षण आणि गोव्यातील महत्त्वाच्या राजकीय व जनहिताच्या प्रश्नांवर सविस्तर चर्चा करण्यात आली.

‘गोंय राखण यात्रे’चा आराखडा निश्चित

२२ सप्टेंबर २०२६ पासून सुरू होणाऱ्या ‘गोंय राखण यात्रे’चा व्यापक आराखडा कार्यकारिणीने निश्चित केला. गोव्याची अस्मिता, पर्यावरण, संविधानिक मूल्ये आणि गोमंतकीयांच्या हक्कांच्या संरक्षणासाठी जनजागृती करणे तसेच राज्यभरातील नागरिकांशी थेट संवाद साधणे, हा यात्रेचा मुख्य उद्देश असल्याचे बैठकीत विरोधी पक्ष नेता युरी आलेमाव यांनी स्पष्ट केले.

मतदार यादी पुनरावलोकन प्रक्रियेचा आढावा घेण्यात आला. पक्षाचे प्रवक्ते सावियो कुतिन्हो यांनी राज्यभरातून प्राप्त झालेल्या तक्रारींची माहिती देत, कोणत्याही पात्र मतदाराला मतदानाच्या संविधानिक अधिकारापासून वंचित राहावे लागू नये, यासाठी आवश्यक ती खबरदारी घेण्याची मागणी केली.

आगामी नगरपालिका निवडणुकांसाठी प्रस्तावित प्रभाग पुनर्रचनेच्या मसुद्याची सविस्तर छाननी करण्यात आली. राजीव गांधी पंचायत राज संघटनेचे अध्यक्ष प्रवीण ब्लॅगन यांनी या प्रक्रियेबाबत माहिती सादर केली. प्रभाग पुनर्रचना पारदर्शक, निष्पक्ष आणि लोकशाही तत्त्वांनुसार व्हावी, अशी भूमिका कार्यकारिणीने व्यक्त केली.

शिस्तभंगाविरोधात कठोर कारवाई

पक्षाच्या शिस्तपालन समितीच्या शिफारशीनुसार शमीला सिद्दीकी आणि मनीषा उसगावकर यांची भारतीय राष्ट्रीय काँग्रेसमधून हकालपट्टी करण्याच्या निर्णयाला राज्य कार्यकारिणीने मंजुरी दिली. निर्णयापूर्वी दोघींनाही शिस्तपालन समितीसमोर आपली बाजू मांडण्याची पूर्ण संधी देण्यात आली होती, असेही स्पष्ट करण्यात आले.
गोव्यातील जनतेच्या प्रश्नांवर प्रभावीपणे आवाज उठविणारी आणि राज्याला सक्षम पर्याय देणारी काँग्रेस संघटना अधिक मजबूत करण्याचा निर्धार व्यक्त करत बैठकीची सांगता झाली.