विशेषतः मोठ्या आर्थिक उलाढालीच्या व्यवसायात पैशांच्या वादातून हिंसक मार्गाचा अवलंब होऊ लागला, तर त्याचा परिणाम गोव्याच्या गुंतवणूक आणि पर्यटन प्रतिमेवरही होऊ शकतो.

गोवा म्हणजे शांतता, पर्यटन आणि सुरक्षिततेची ओळख. मात्र, गेल्या काही वर्षांत राज्यात घडलेल्या प्राणघातक हल्ल्यांच्या मालिकेकडे पाहिले तर या प्रतिमेला गंभीर तडे जात असल्याचे जाणवते. सामाजिक कार्यकर्ते रामा काणकोणकर यांच्यावरील हल्ला असो, पर्वरीतील विलास मेथर हत्या असो किंवा टोळीयुद्धातून घडलेल्या घटना असोत, हिंसाचाराची अनेक उदाहरणे गोव्याच्या सामाजिक वास्तवाची दुसरी बाजू दाखवतात. पर्वरीतील मॅजेस्टिक परिसरात कॅसिनो व्यावसायिक श्रीनिवास पी. नायक यांच्यावर झालेला कथित गोळीबार मात्र या पार्श्वभूमीवर अधिक गंभीर ठरतो.
या घटनेचे गांभीर्य केवळ गोळीबार झाला म्हणून नाही, तर तो उत्तर गोवा पोलिस अधीक्षक कार्यालय आणि पर्वरी पोलिस स्थानकाच्या जवळच्या परिसरात घडल्यामुळे अधिक वाढते. दोन अज्ञात व्यक्ती शस्त्रांसह येतात, गोळीबार करतात आणि पसार होतात, हेच पोलिस यंत्रणेच्या कार्यक्षमतेबाबत अस्वस्थ करणारे प्रश्न निर्माण करणारे आहे. हल्ल्यामागे नेमके कोण आहे, कारण काय आहे आणि हल्लेखोरांना कुणाचा आश्रय होता का, याची उत्तरे तपासातूनच मिळतील.
या प्रकरणात ‘सुपारी किलर्स’चा संशय व्यक्त केला जात असला तरी तो अद्याप तपासाचा निष्कर्ष नाही. गोवा नोंदणीची बेवारस कार हा तपासातील महत्त्वाचा धागा असल्याचे सांगितले जात आहे. सीसीटीव्ही फुटेज, वाहनाचा मागोवा आणि इतर तांत्रिक पुराव्यांच्या आधारे पोलिसांनी हल्लेखोरांपर्यंत पोहोचणे आवश्यक आहे.
नायक यांचा कॅसिनो व्यवसाय आणि त्यांच्याशी संबंधित पूर्वीचे व्यावसायिक वाद यामुळे या घटनेला आर्थिक आणि व्यावसायिक संघर्षाची किनार असल्याची शक्यता नाकारता येत नाही. हॉटेल फिदाल्गोच्या मालकीसंदर्भातील न्यायालयीन वादही पुन्हा चर्चेत आला आहे. मात्र, या वादातील कोणत्याही पक्षाचा या गोळीबाराशी संबंध असल्याचा ठोस पुरावा अद्याप समोर आलेला नाही. त्यामुळे तपासाआधी कुणालाही आरोपीच्या पिंजऱ्यात उभे करणे योग्य ठरणार नाही.
खरा प्रश्न त्यापेक्षा मोठा आहे. पर्यटन आणि व्यवसायासाठी गोव्याने निर्माण केलेली मोकळीक जर गुन्हेगारी कारवायांसाठी वापरली जात असेल, तर ही बाब राज्याच्या सुरक्षिततेसाठी धोक्याची घंटा आहे. विशेषतः मोठ्या आर्थिक उलाढालीच्या व्यवसायात पैशांच्या वादातून हिंसक मार्गाचा अवलंब होऊ लागला, तर त्याचा परिणाम गोव्याच्या गुंतवणूक आणि पर्यटन प्रतिमेवरही होऊ शकतो.
सर्वांत महत्त्वाचे म्हणजे पोलिसांवरील जनतेचा विश्वास अबाधित राहिला पाहिजे. राजकीय हस्तक्षेपाच्या आरोपांमुळे या विश्वासाला तडा गेला असेल, तर तो दूर करण्याची जबाबदारी सरकारची आहे. गुंडांना कायद्याची भीती आणि सामान्य नागरिकांना पोलिसांवर विश्वास हीच कोणत्याही सुरक्षित राज्याची खरी ओळख असते.
या गोळीबाराचा तपास केवळ एका व्यक्तीवरील हल्ल्यापुरता मर्यादित राहू नये. हल्लेखोर कोण, त्यांना शस्त्रे कुठून मिळाली, त्यांना कुणी पाठवले आणि आर्थिक किंवा राजकीय पाठबळ होते का, या प्रत्येक प्रश्नाचे उत्तर शोधले पाहिजे. अन्यथा आजची गोळी उद्या गोव्याच्या शांततेच्या प्रतिमेवरच झाडली जाईल.