Gaonkaari
प्रभव नायक यांची उपरोधिक टीका
मडगाव:
गोव्यातील बेरोजगारीचा प्रश्न अखेर सुटणार असल्याचे चित्र सरकारकडून रंगवले जात आहे; मात्र तो उद्योग, गुंतवणूक किंवा ठोस रोजगार धोरणांमुळे नव्हे, तर जादूमुळेच सुटणार का, असा उपरोधिक सवाल मडगांवचो आवाज व युवा नेते प्रभव नायक यांनी उपस्थित केला आहे.
आरोग्यमंत्री विश्वजित राणे यांनी मुख्यमंत्री डॉ. प्रमोद सावंत यांना “जादूगार” संबोधत सहा महिन्यांत २०,००० नोकऱ्या देण्याचा दावा केल्याच्या पार्श्वभूमीवर प्रभव नायक यांनी भाजप सरकारवर निशाणा साधला. “भारतीय जादू पार्टीचा गोव्याचा चीफ मॅजीशियन आता आपल्या टोपीतून थेट २०,००० नोकऱ्या बाहेर काढणार आहे,” अशी खोचक टीका त्यांनी केली.
प्रभव नायक म्हणाले की, रोजगारनिर्मिती हा गंभीर प्रशासकीय आणि आर्थिक नियोजनाचा विषय आहे. मात्र सरकारच्या विधानांमुळे हा विषय जणू जादूचा खेळ बनविला जात आहे. गोव्यात हजारो सुशिक्षित युवक-युवती रोजगाराच्या प्रतीक्षेत असताना सरकारकडून सातत्याने मोठमोठ्या घोषणा केल्या जात आहेत; पण त्या पूर्ण करण्यासाठी स्पष्ट आराखडा किंवा वेळापत्रक जनतेसमोर ठेवलेले नाही.
गोवा अजूनही राष्ट्रीय सरासरीच्या तुलनेत उच्च बेरोजगारी दराचा सामना करत असल्याचे सांगत नायक यांनी सरकारच्या रोजगार धोरणावर प्रश्नचिन्ह उपस्थित केले. सरकारी नोकऱ्यांबाबत युवकांमध्ये प्रचंड अपेक्षा असताना भरती प्रक्रियेत पारदर्शकतेचा अभाव, विलंब आणि राजकीय हस्तक्षेपाचे आरोप वारंवार पुढे येत असल्याचे त्यांनी नमूद केले.
कर्मचारी निवड आयोगाला बगल देत विविध सरकारी विभागांमध्ये भरती प्रक्रिया राबविली जात असल्याचे आरोप होत असल्याकडेही त्यांनी लक्ष वेधले. तसेच कथित ‘कॅश फॉर जॉब्स’ प्रकरणामुळे सरकारी भरतीवरील जनतेचा विश्वास डळमळीत झाला आहे. रोजगार शोधणाऱ्या युवकांच्या मनातील प्रश्नांची उत्तरे देण्याऐवजी सरकार केवळ घोषणांमधून वातावरणनिर्मिती करत आहे, असा आरोप त्यांनी केला.
“सरकारने खरोखरच सहा महिन्यांत २०,००० नोकऱ्या निर्माण केल्या, तर गोव्यातील जनता त्याचे स्वागतच करेल. पण रोजगारनिर्मिती ही टोपीतून ससा किंवा नोकऱ्या काढण्याचा जादूचा खेळ नाही. त्यासाठी पारदर्शक भरती प्रक्रिया, जबाबदार प्रशासन, कौशल्याधारित संधी, औद्योगिक गुंतवणूक आणि स्पष्ट धोरणांची गरज असते,” असे प्रभव नायक म्हणाले.
गोव्याच्या युवकांना राजकीय भ्रमजाल, प्रसिद्धीबाजी आणि निवडणूकपूर्व आश्वासने नकोत. त्यांना खऱ्या अर्थाने रोजगार, संधी आणि न्याय्य भरती प्रक्रिया हवी आहे, असे स्पष्ट करत प्रभव नायक यांनी सरकारवर जोरदार टीका केली.
