मिशन फॉर लोकल, पेडणेचे राजन कोरगांवकर यांची मागणी

गांवकारी, दि. ८ (प्रतिनिधी)

पेडणे तालुक्यातील तोर्से पंचायत क्षेत्रातील फकिरपाटो वाड्यावरील रहिवाशांबाबत सरकारकडून अन्याय सुरू आहे. गोवा-महाराष्ट्र सीमेलगतच्या या गावातील नागरिक अजूनही अनेक मूलभूत सुविधांपासून वंचित आहेत. त्यांचा आवाज सरकार दरबारी पोहोचत नसल्याची खंत राजन कोरगांवकर यांनी व्यक्त केली.
मिशन फॉर लोकल, पेडणे या संस्थेच्या वतीने राजन कोरगांवकर यांनी फकिरपाटो गावाला भेट दिली. तोर्से पंचायत क्षेत्रातील हा प्रभाग असून येथे बहुसंख्य शेतकरी वास्तव्यास आहेत. या वाड्यावरील सरकारी शाळेची अवस्था अत्यंत दयनीय आहे. त्यामुळे येथील मुलांना तोर्से सरकारी शाळा किंवा पेडणे येथे शिक्षणासाठी जावे लागते. प्रवासी वाहनांची सोय नसल्यामुळे नागरिकांना दररोज कितीतरी अंतर पायी चालावे लागते.
या वाड्यातील अनेक सुशिक्षित युवक रोजगाराच्या प्रतिक्षेत आहेत. सार्वजनिक वाहतुकीअभावी त्यांना नोकरीच्या संधी मिळत नाहीत. महिलांचे प्रश्न अधिक गंभीर आहेत. पायवाटा नसल्यामुळे त्यांना मोठा त्रास सहन करावा लागतो. सरकारी योजनांचा लाभ महिलांना मिळाला असला तरी गेल्या सहा ते सात महिन्यांपासून गृहआधार योजनेचे पैसे मिळाले नसल्याची तक्रार त्यांनी केली. पेडणेतील गोवा राज्य सहकारी बँकेकडून सहकार्य मिळत नसल्याचीही तक्रार त्यांनी केली. पणजीपर्यंत जाऊन चौकशी केली तरी काहीच निष्पन्न झाले नाही, असे त्यांनी सांगितले.
येथील शेतीसाठी वापरण्यात येणारा पंप बिघडलेला असून त्याला कित्येक महिने झाले आहेत. जलस्त्रोत खात्याकडून अद्याप पंप बदलण्यात आलेला नाही. पाण्याअभावी शेतीचे मोठे नुकसान होत आहे. या सर्व समस्यांबाबत सरकार दरबारी पाठपुरावा करून त्या सोडविण्याचा प्रयत्न करू, असे राजन कोरगांवकर यांनी सांगितले.
यावेळी रश्मी कोरगांवकर, मोपाचे माजी सरपंच रूपेश परब, तुळशीदास कवठणकर आदी उपस्थित होते.