गांवकारी, दि. १८

गोमंतक हिंदू तेली समाज आणि तेली ज्ञातीबांधव यांच्या संयुक्त विद्यमाने आयोजित स्नेहसंमेलन ज्ञानदा सभागृह, हरमल पंचक्रोशी शिक्षण संस्था, हरमल येथे मोठ्या उत्साहात पार पडले. या कार्यक्रमात विविध उपक्रमांद्वारे सामाजिक एकोपा आणि बंधुत्वाचे दर्शन घडले.
कार्यक्रमाची सुरुवात समाजाचे संस्थापक अध्यक्ष स्वर्गीय श्री. मोहन डीचोलकर यांच्यासह इतर दिवंगत ज्ञातीबांधवांना श्रद्धांजली अर्पण करून करण्यात आली. त्यानंतर समाजाचे माजी अध्यक्ष श्री. केशव मठकर यांनी डीचोलकर यांच्या कार्यकर्तृत्वावर थोडक्यात प्रकाश टाकत त्यांच्या योगदानाची आठवण करून दिली.
समाजाचे विद्यमान अध्यक्ष श्री. सत्यवान सातार्डेकर आणि सम्मेलनाध्यक्ष श्री. गंगाराम मठकर यांनीही आपले मनोगत व्यक्त करत समाज संघटित असण्याचे फायदे स्पष्ट केले.
या वेळी गुणवंत विद्यार्थ्यांचा स्मृतिचिन्ह देऊन सत्कार करण्यात आला. तसेच समाजातील ज्येष्ठ नागरिकांचा मान्यवरांच्या हस्ते गौरव करण्यात आला.
कार्यक्रमाचे प्रमुख पाहुणे निवृत्त अवर सचिव श्री. उदय डीचोलकर यांनी विद्यार्थ्यांना शिक्षणात प्रगती करून समाजाच्या विश्वासाला जागण्याचे आवाहन केले. उद्योजक आणि समाजातील मान्यवर श्री. विनोद शेलार यांनी विद्यार्थ्यांना नोकरी व व्यवसायात यश मिळवण्यासाठी प्रेरणा दिली.
श्री. सूदन बर्वे यांनी समाजातील ज्येष्ठ विचारवंतांचे व कार्यकर्त्यांचे सामाजिक योगदान अधोरेखित करत उपस्थितांना मार्गदर्शन केले.
कार्यक्रमाचा समारोप विविध वयोगटांतील मुलांनी सादर केलेल्या सांस्कृतिक कार्यक्रमाने झाला. नृत्य, गायन आणि नाट्य सादरीकरणाच्या माध्यमातून मुलांनी आपली कला सादर करून कार्यक्रमात रंगत आणली.