मडगाव,दि.२६: पक्षांतर केलेले मडगावचे आमदार दिगंबर कामत यांनी १९ जुलै २०२३ रोजी गोवा विधानसभेत आमदारांचे वेतन, वाहन कर्ज आणि कर्मचारी संख्येत वाढ करण्याच्या मुद्द्यांवर आवाज उठविण्यास कोणतीही कसर सोडली नव्हती. मात्र, आता खरा प्रश्न असा आहे की, इंधन दरवाढीच्या ओझ्याखाली भरडल्या जाणाऱ्या सामान्य गोमंतकीयांना दिलासा मिळावा यासाठी ते तितक्याच उत्साहाने आणि तत्परतेने आवाज उठवतील का, असा सवाल मडगांवचो आवाज आणि युवा नेते प्रभव नायक यांनी उपस्थित केला आहे.

प्रभव नायक यांनी दिगंबर कामत यांना आव्हान देत म्हटले की, आमदारांच्या सुविधांसाठी ज्या जोमाने त्यांनी भूमिका घेतली होती, त्याच ठामपणाने त्यांनी इंधन दर कमी करण्याची मागणी सरकारकडे करावी. “गोव्याच्या जनतेबद्दल खरी आस्था असेल, तर ती केवळ शब्दांत नव्हे, तर कृतीत दिसली पाहिजे,” असे ते म्हणाले.

ते पुढे म्हणाले की, पेट्रोल आणि डिझेलच्या किमतींचा थेट परिणाम प्रत्येक कुटुंब, शेतकरी, मच्छीमार, टॅक्सीचालक, लघुउद्योजक आणि रोज प्रवास करणाऱ्या नागरिकांवर होतो. इंधन दरातील प्रत्येक वाढ वाहतूक खर्च वाढवते आणि त्याचा परिणाम जीवनावश्यक वस्तूंच्या किमतींवर होऊन सर्वसामान्यांचे जगणे अधिक कठीण बनते.

नायक म्हणाले की, एकीकडे सामान्य गोमंतकीयांना महागाई आणि इंधन दरवाढीचा फटका सहन करावा लागत असताना, दुसरीकडे सरकार कार्यक्रम, जाहिराती आणि प्रसिद्धी मोहिमांवर मोठ्या प्रमाणात खर्च करत आहे. पंतप्रधानांनी काटकसरीचे आणि अनावश्यक खर्च टाळण्याचे आवाहन करूनही मडगावचे आमदार आणि सार्वजनिक बांधकाम मंत्री दिगंबर कामत हे परदेश दौऱ्यावर असल्याची माहिती आहे. अशा प्राधान्यक्रमांमुळे सत्ताधारी व्यवस्था आणि सर्वसामान्य जनतेच्या दैनंदिन संघर्षामधील दुरावा स्पष्टपणे दिसून येतो.

जनकल्याणाच्या घोषणा करणाऱ्या भाजपच्या डबल इंजिन सरकारने वारंवार इंधन दरवाढीच्या माध्यमातून नागरिकांवर आर्थिक बोजा टाकला आहे. महागाईमुळे घरगुती अर्थसंकल्प कोलमडत असताना सरकारने नागरिकांना दिलासा देण्यावर भर द्यायला हवा. दिगंबर कामत यांनी सामान्य जनतेच्या प्रश्नांवर मौन बाळगणे थांबवून, सरकारमधील आपला प्रभाव वापरून गोमंतकीयांना तातडीने दिलासा मिळवून देण्यासाठी पुढाकार घ्यावा, अशी मागणी प्रभव नायक यांनी केली.