गांवकारी, दि. ९ (प्रतिनिधी)
गोव्यात आगामी विधानसभा निवडणुकीच्या पार्श्वभूमीवर आम आदमी पक्षाचे राष्ट्रीय संयोजक तथा दिल्लीचे माजी मुख्यमंत्री अरविंद केजरीवाल यांनी गोमंतकीय जनतेसाठी सहा महत्त्वाच्या गॅरंटी जाहीर केल्या आहेत.
पणजी येथे आयोजित ‘आप’च्या गॅरंटी कार्यक्रमात उपस्थितांना संबोधित करताना त्यांनी वीज, महिला सक्षमीकरण, आरोग्य, जमीन संरक्षण आणि क्रीडा सुविधांबाबत महत्त्वपूर्ण आश्वासने दिली. गोव्यात आम आदमी पक्षाचे सरकार सत्तेवर आल्यास प्रत्येक कुटुंबाला चोवीस तास अखंडित वीजपुरवठा आणि दरमहा ३०० युनिट मोफत वीज देण्यात येईल. प्रत्येक महिलेला दरमहा ३ हजार रुपयांची आर्थिक मदत, प्रत्येक कुटुंबाला १० लाख रुपयांचे आरोग्य विमा संरक्षण आणि सर्व महिलांना बसमधून मोफत प्रवासाची सुविधा उपलब्ध करून देण्यात येईल, अशी घोषणा केजरीवाल यांनी केली.

गोव्यात जमीन रूपांतरणाच्या मुद्द्यावरून वादग्रस्त ठरलेले नगरनियोजन कायद्यातील कलम ३९ अ सत्तेवर आल्यानंतर अवघ्या एका महिन्यात रद्द करण्याची महत्त्वपूर्ण गॅरंटीही त्यांनी दिली. त्याचबरोबर राज्यातील प्रत्येक गावात क्रीडांगण उभारण्याचे आश्वासन त्यांनी दिले.