पणजी, २९ ऑक्टोबर (प्रतिनिधी) : वास्को बाजारपेठेतील भीषण आगीची निष्पक्ष आणि कालबद्ध चौकशी करून नुकसानग्रस्त व्यापारी व विक्रेत्यांना तातडीने योग्य भरपाई देण्यात यावी, अशी मागणी गोवा प्रदेश काँग्रेस समितीच्या राजकीय व्यवहार समितीने (पीएसी) केली आहे. राज्यातील आपत्ती व्यवस्थापन यंत्रणेच्या कार्यक्षमतेचाही आढावा घेऊन त्रुटी आढळल्यास संबंधितांवर जबाबदारी निश्चित करावी, अशी मागणी बैठकीत करण्यात आली.

 

 

गोवा प्रदेश काँग्रेस समितीच्या राजकीय व्यवहार समितीची बैठक गुरुवारी पणजी येथे पार पडली. या बैठकीत गोय राखोण यात्रेचा आढावा, आगामी विधानसभा निवडणुकीच्या पार्श्वभूमीवर पक्षाची रणनीती, संभाव्य राजकीय युती आणि संघटनात्मक बळकटीकरण यांसह विविध विषयांवर चर्चा करण्यात आली.

वास्को बाजारपेठेतील आगीत शंभरहून अधिक दुकाने जळून खाक झाल्याच्या घटनेबद्दल समितीने तीव्र चिंता व्यक्त केली. नुकसानग्रस्त व्यापाऱ्यांप्रती सहवेदना व्यक्त करताना आगीच्या नेमक्या कारणांचा शोध घेण्यासाठी स्वतंत्र आणि निष्पक्ष चौकशी करण्याची मागणी करण्यात आली. एकाच वेळी विविध ठिकाणी आगी लागल्याच्या वृत्तांचीही चौकशी व्हावी. चौकशी पूर्ण होण्यापूर्वी कोणतीही शक्यता नाकारली जाऊ नये, अशी भूमिका समितीने मांडली.

सरकारने तातडीने नुकसानीचे पंचनामे करून बाधित व्यापारी आणि विक्रेत्यांना पुरेशी आर्थिक मदत द्यावी. तसेच आपत्ती व्यवस्थापन यंत्रणेची पूर्वतयारी आणि आग विझविण्यासाठी करण्यात आलेल्या उपाययोजनांचीही तपासणी करावी, अशी मागणी करण्यात आली.

गोंय राखोण अभियान प्रत्येक मतदारसंघात पोहोचवणार

गोंय राखोण यात्रा यशस्वी केल्याबद्दल समितीने प्रदेश काँग्रेस अध्यक्ष गिरीश चोडणकर, विरोधी पक्षनेते युरी आलेमाव, पक्षाचे कार्याध्यक्ष, गोवा प्रभारी माणिकराव ठाकरे, सहप्रभारी डॉ. अंजली निंबाळकर तसेच विविध आघाड्यांचे पदाधिकारी आणि कार्यकर्त्यांचे अभिनंदन केले.

लोकसभेतील विरोधी पक्षनेते राहुल गांधी यांनी १८ ऑक्टोबर रोजी प्रारंभ केलेले ४५ दिवसांचे गोय राखोण अभियान राज्यातील प्रत्येक विधानसभा मतदारसंघात राबविण्याचा निर्णय घेण्यात आला. या अभियानांतर्गत घरोघरी संपर्क, जाहीर सभा आणि कोपरा बैठका आयोजित करून नागरिकांच्या समस्या जाणून घेतल्या जाणार आहेत.

रिव्होल्युशनरी गोवन्ससोबत युतीची चर्चा अंतिम टप्प्यात

आगामी विधानसभा निवडणुकीच्या पार्श्वभूमीवर रिव्होल्युशनरी गोवन्स (आरजी) पक्षासोबत सुरू असलेल्या युतीच्या चर्चेचाही बैठकीत आढावा घेण्यात आला. समान किमान कार्यक्रम, धोरणात्मक प्राधान्यक्रम आणि निवडणूक रणनीती यांसंदर्भात चर्चा सुरू असून, युतीबाबतची बोलणी अंतिम टप्प्यात असल्याचे काँग्रेसने स्पष्ट केले.

गोव्याचे हित आणि समान उद्दिष्टे लक्षात घेऊन राजकीय पक्षांनी समन्वयाने पुढे जाण्याची आवश्यकता समितीने व्यक्त केली.

भाजपच्या १५ वर्षांच्या कारभाराविरोधात आरोपपत्र

राज्यातील भाजपच्या गेल्या १५ वर्षांच्या कारभाराचे मूल्यमापन करणारे आरोपपत्र तयार करण्याबाबतही बैठकीत चर्चा झाली. हे आरोपपत्र राज्यपालांना सादर करण्यात येणार असून, त्यानंतर गोय राखोण अभियानाच्या माध्यमातून घरोघरी वितरित केले जाणार आहे.

भाजप सरकारच्या कारभारातील कथित अपयश, जनतेच्या समस्या आणि विविध प्रश्नांवर काँग्रेसची भूमिका या आरोपपत्रातून मांडली जाणार आहे.

याशिवाय प्रदेश, जिल्हा आणि गट समित्यांमधील समन्वय वाढविणे, तळागाळातील पक्षसंघटना मजबूत करणे आणि बूथ पातळीवरील कार्यकर्त्यांना सक्रिय करण्याबाबतही निर्णय घेण्यात आले.

आगामी निवडणुकीच्या पार्श्वभूमीवर जनसंपर्क वाढवून भाजप सरकारला विविध प्रश्नांवर जाब विचारण्याचा निर्धार काँग्रेसच्या राजकीय व्यवहार समितीने व्यक्त केला.