पणजी, ४ नोव्हेंबर (प्रतिनिधी) : राज्यातील मोटरसायकल टॅक्सी पायलट व्यावसायिकांसाठी यापूर्वी सुरू असलेल्या मात्र सध्या प्रलंबित असलेल्या विविध कल्याणकारी योजना येत्या आठ दिवसांत पुन्हा सुरू करण्याचे आश्वासन मुख्यमंत्री डॉ. प्रमोद सावंत यांनी दिले आहे. गोवा मोटरसायकल टॅक्सी रायडर्स असोसिएशनचे अध्यक्ष सुरेश ठाकूर यांच्या नेतृत्वाखालील शिष्टमंडळाने मुख्यमंत्र्यांची भेट घेतली असता हे आश्वासन देण्यात आले.

असोसिएशनने प्रसिद्धीस दिलेल्या पत्रकानुसार, ५० वर्षे पूर्ण झालेल्या पायलट व्यावसायिकांना मासिक दोन हजार रुपये आर्थिक साहाय्य देण्याची योजना पुन्हा सुरू करण्यात येणार आहे. ही रक्कम दरमहा थेट संबंधित पायलटांच्या बँक खात्यात जमा केली जाणार आहे.

तसेच ज्येष्ठ पायलट व्यावसायिकांना सध्या मिळणाऱ्या दोन हजार रुपयांच्या आर्थिक साहाय्यात एक हजार रुपयांची वाढ करून ते दरमहा तीन हजार रुपये करण्यात येणार असल्याचे आश्वासन मुख्यमंत्र्यांनी दिले आहे.

गृह आधार योजनेचा लाभ स्वतंत्रपणे

पायलट व्यावसायिकांच्या कुटुंबातील महिलांना मिळणाऱ्या गृह आधार योजनेच्या लाभावर पायलटांच्या आर्थिक साहाय्य योजनेचा कोणताही परिणाम होणार नाही. या दोन्ही स्वतंत्र योजना असल्यामुळे पात्र लाभार्थ्यांना त्यांचा लाभ घेता येईल, असेही स्पष्ट करण्यात आले आहे.

असोसिएशनचे प्रमाणपत्र आवश्यक

या योजनांचा लाभ घेण्यासाठी संबंधित पायलट व्यावसायिकांची असोसिएशनकडून पडताळणी करणे आवश्यक राहणार आहे. लाभार्थ्यांनी असोसिएशनचे प्रमाणपत्र प्राप्त करणे बंधनकारक असल्याचे संघटनेने स्पष्ट केले आहे.

दरम्यान, मुख्यमंत्री डॉ. सावंत यांनी यापूर्वी जाहीर केलेली ५० टक्के अनुदानाची इलेक्ट्रिक मोटरसायकल योजना लवकरच पायलट व्यावसायिकांसाठी उपलब्ध करून देण्यात येणार आहे. या योजनेचा लाभ घेऊ इच्छिणाऱ्या पायलटांनी असोसिएशनच्या कार्यालयात नावनोंदणी करावी, असे आवाहन करण्यात आले आहे.

गोवा मोटरसायकल टॅक्सी रायडर्स असोसिएशनचे अध्यक्ष सुरेश ठाकूर यांनी प्रसिद्धीपत्रकाद्वारे ही माहिती दिली आहे. प्रलंबित योजना आठ दिवसांत सुरू करण्याचे आश्वासन मिळाल्याने राज्यातील पायलट व्यावसायिकांना दिलासा मिळण्याची अपेक्षा व्यक्त होत आहे.