मडगाव, ३० जुलै : सक्तीने लागू करण्यात आलेल्या E20 पेट्रोलमुळे वाहनांचे मायलेज कमी होत असून इंजिनाशी संबंधित बिघाड आणि देखभाल खर्च वाढल्याच्या तक्रारी मोटारसायकल पायलट व वाहनचालकांनी आम आदमी पार्टीच्या नेत्यांकडे मांडल्या. या पार्श्वभूमीवर आप गोव्याने १ ऑगस्ट रोजी आयोजित राष्ट्रीय ऑनलाइन टाउनहॉलमध्ये नागरिकांनी सहभागी व्हावे, असे आवाहन केले आहे.

आप गोव्याचे कार्याध्यक्ष गर्सन गोम्स, उपाध्यक्ष रोके मस्कारेन्हास, युवा विंगचे उपाध्यक्ष नीश कुटिन्हो आणि इतर पदाधिकाऱ्यांनी मडगाव येथे मोटारसायकल पायलट व वाहनमालकांशी संवाद साधून त्यांच्या अडचणी जाणून घेतल्या.

पायलटांनी सांगितले की, E20 पेट्रोलच्या वापरानंतर वाहनांचे मायलेज लक्षणीयरीत्या घटले आहे. आधीच कमी नफ्यात व्यवसाय करणाऱ्या पायलटांवर वाढलेल्या इंधन खर्चासह वारंवार होणाऱ्या दुरुस्तीचा अतिरिक्त आर्थिक भार पडत आहे. इंजिन, इंधन टाकी आणि फ्लोट पिनसारख्या भागांमध्ये वारंवार बिघाड होत असल्याने दैनंदिन उत्पन्नावर परिणाम होत असल्याचे त्यांनी सांगितले.

वाहनमालकांनीही वाहनांच्या दुरुस्तीसाठी मोठा खर्च करावा लागत असल्याची तक्रार केली. काही मेकॅनिकांच्या म्हणण्यानुसार, सध्या रस्त्यावर धावणारी अनेक वाहने E20 इंधनाशी पूर्णपणे सुसंगत नसल्याने इंजिनाशी संबंधित समस्या वाढत असल्याचेही चर्चेदरम्यान सांगण्यात आले.

यावेळी वाहनचालकांनी सरकारने ग्राहकांना शुद्ध पेट्रोल आणि E20 पेट्रोल हे दोन्ही पर्याय उपलब्ध करून द्यावेत, अशी मागणी केली. तसेच E20 पेट्रोलचे उष्मांक मूल्य (Calorific Value) आणि इंधन कार्यक्षमता तुलनेने कमी असल्याने त्याची किंमत नियमित पेट्रोलपेक्षा कमी ठेवावी, अशीही मागणी करण्यात आली.

आपच्या नेत्यांनी सरकारने E20 पेट्रोलची सक्ती थांबवून प्रत्येक पेट्रोल पंपावर दोन्ही प्रकारचे इंधन उपलब्ध करून द्यावे आणि E20 पेट्रोलच्या किंमतीचा फेरविचार करावा, अशी मागणी पुन्हा केली.

यावेळी १ ऑगस्ट रोजी आपचे राष्ट्रीय संयोजक अरविंद केजरीवाल यांच्या नेतृत्वाखाली आयोजित करण्यात आलेल्या राष्ट्रीय ऑनलाइन टाउनहॉलमध्ये सहभागी होण्याचे आवाहन करण्यात आले. सहभागी होण्यासाठी ८५८८८३३२१२ या क्रमांकावर व्हॉट्सअॅप संदेश पाठविल्यानंतर टाउनहॉलची लिंक मिळणार असल्याची माहिती आपच्या नेत्यांनी दिली.