सर्व समविचारी पक्षांशी तातडीने चर्चा करणार; ‘मतचोरी’चे ठोस पुरावे मिळाल्याचा दावा, अधिकृत तक्रार दाखल करण्याचा निर्णय

गांवकारी, १६ ऑक्टोबर (प्रतिनिधी) : आगामी विधानसभा निवडणुकीत भाजपचा पराभव करण्यासाठी सर्व विरोधी पक्षांनी मतभेद बाजूला ठेवून एकाच व्यासपीठावर एकत्र यावे, असा महत्त्वपूर्ण निर्णय गोवा फॉरवर्ड पक्षाच्या राज्य कार्यकारिणीने घेतला आहे. भाजपला सत्तेतून हटविण्यासाठी कटिबद्ध असलेल्या सर्व समविचारी राजकीय पक्षांशी तातडीने चर्चा सुरू करण्याचेही पक्षाने निश्चित केले आहे.

राज्यातील जनभावनांचा आदर करून हा निर्णय घेण्यात आल्याचे गोवा फॉरवर्डने स्पष्ट केले. भाजपच्या जातीयवादी, भ्रष्ट आणि सूडबुद्धीच्या राजकारणाविरोधात सर्व विरोधी शक्तींनी एकजुटीने निवडणूक लढविणे आवश्यक असल्याची भूमिका पक्षाने मांडली आहे.

दरम्यान, राज्य कार्यकारिणीच्या बैठकीत कथित ‘मतचोरी’च्या गंभीर विषयावरही चर्चा झाली. निवडणूक प्रक्रियेतील गैरप्रकारांचे ठोस पुरावे समोर आल्याचा दावा पक्षाने केला असून, यासंदर्भात अधिकृत तक्रार दाखल करून हे प्रकरण तातडीने संबंधित यंत्रणांकडे नेण्याचा निर्णय घेतला आहे. मात्र, या पुराव्यांचा तपशील पक्षाच्या निवेदनात देण्यात आलेला नाही.

गोव्यातील मतदारांनी सतर्क राहून मतदार यादीतील आपली नावे आणि संबंधित तपशील तपासावेत, असे आवाहनही गोवा फॉरवर्डने केले आहे.

आपल्या मतदानाच्या अधिकारावर कोणत्याही प्रकारे गदा येणार नाही, याची प्रत्येक मतदाराने खात्री करून घ्यावी, असे पक्षाने म्हटले आहे.

गोवा फॉरवर्डच्या या निर्णयामुळे आगामी विधानसभा निवडणुकीच्या पार्श्वभूमीवर विरोधी पक्षांच्या संभाव्य एकजुटीच्या हालचालींना वेग येण्याची शक्यता निर्माण झाली आहे.