अॅड. अजय प्रभू गांवकर, अमित पाटकर यांचे निवेदन

गांवकारी,दि.१८(प्रतिनिधी)

गोवा राज्य फलोत्पादन महामंडळात कार्यरत कंत्राटी कर्मचाऱ्यांच्या विविध प्रलंबित मागण्यांकडे प्रशासनाचे लक्ष वेधण्यासाठी अॅड. अजय प्रभू गावकर आणि काँग्रेस नेते अमित पाटकर यांनी कर्मचाऱ्यांसह फलोत्पादन महामंडळाच्या व्यवस्थापकीय संचालकांची भेट घेतली. यावेळी कंत्राटी कर्मचाऱ्यांच्या सेवा, वेतन आणि नोकरीच्या सुरक्षिततेशी संबंधित विविध मागण्यांचे निवेदन व्यवस्थापकीय संचालकांना सादर करण्यात आले.

फलोत्पादन महामंडळाच्या विविध विभागांमध्ये अनेक कर्मचारी कंत्राटी पद्धतीने काम करीत आहेत. दीर्घकाळ सेवा बजावूनही या कर्मचाऱ्यांच्या सेवाविषयक अनेक समस्या प्रलंबित असल्याचा मुद्दा शिष्टमंडळाने व्यवस्थापनासमोर मांडला. महामंडळाच्या दैनंदिन कामकाजात कंत्राटी कर्मचाऱ्यांचे महत्त्वपूर्ण योगदान असून त्यांच्या न्याय्य मागण्यांचा सहानुभूतीपूर्वक विचार करण्याची गरज असल्याचे यावेळी सांगण्यात आले.

अनेक कर्मचारी दीर्घकाळापासून कंत्राटी तत्त्वावर सेवा देत असल्याने त्यांच्या भवितव्याबाबत अनिश्चितता निर्माण होत असल्याचे शिष्टमंडळाने निदर्शनास आणून दिले. अशा कर्मचाऱ्यांच्या सेवेला स्थैर्य देण्यासाठी शासन आणि महामंडळाने ठोस धोरण आखावे, अशी मागणी करण्यात आली.

कंत्राटी कर्मचाऱ्यांना त्यांच्या कामाचे स्वरूप, सेवाकाळ आणि जबाबदारीच्या अनुषंगाने योग्य वेतन व अन्य सेवाविषयक लाभ मिळणे आवश्यक असल्याची भूमिकाही मांडण्यात आली. कर्मचाऱ्यांच्या समस्या दीर्घकाळ प्रलंबित न ठेवता त्यावर कालबद्ध पद्धतीने निर्णय घेण्याची मागणी करण्यात आली.