पणजी : रिव्होल्युशनरी गोअन्स पार्टीच्या (RGP) नवीन राज्य कार्यालयाचे लवकरच उद्घाटन करण्यात येणार असून, पक्षाच्या संघटनात्मक वाटचालीतील हा महत्त्वाचा टप्पा ठरणार असल्याचे पक्षाने प्रसिद्धीपत्रकाद्वारे म्हटले आहे.

या उद्घाटन सोहळ्यासाठी राज्यभरातील आरजीपीचे पदाधिकारी, कार्यकर्ते, सदस्य, समर्थक, स्वयंसेवक आणि हितचिंतक एकत्र येणार आहेत. गोवा आणि गोमंतकीयांच्या हितासाठी अधिक मजबूत, एकसंध आणि जनकेंद्रित राजकीय चळवळ उभारण्याच्या पक्षाच्या प्रयत्नांना नव्या कार्यालयामुळे अधिक बळ मिळेल, असा विश्वास व्यक्त करण्यात आला आहे.

नवीन राज्य कार्यालयातून पक्षाच्या राज्यव्यापी संघटनात्मक कामकाजाचे नियोजन आणि समन्वय केला जाणार आहे. त्याचबरोबर जनतेशी थेट संपर्क, विविध प्रश्नांचा पाठपुरावा तसेच तळागाळातील पक्षकार्य अधिक प्रभावी करण्यासाठी हे कार्यालय मध्यवर्ती केंद्र म्हणून काम करणार असल्याचे आरजीपीने म्हटले आहे.

नव्या कार्यालयाच्या उद्घाटनामुळे पक्षाची संघटनात्मक यंत्रणा अधिक मजबूत करण्याबरोबरच कार्यकर्ते आणि जनतेमधील संवाद वाढविण्यास मदत होईल, अशी अपेक्षा पक्षाने व्यक्त केली आहे.

या उद्घाटन सोहळ्यास आरजीपीचे सर्व पदाधिकारी, सदस्य, कार्यकर्ते, समर्थक, स्वयंसेवक आणि हितचिंतकांनी मोठ्या संख्येने उपस्थित राहावे, असे आवाहन पक्षाच्या वतीने करण्यात आले आहे.