Gaonkaari
नगर नियोजनमंत्री विश्वजीत राणे यांचे लेखी उत्तर
गांवकारी, दि. १७ (प्रतिनिधी)
नगर नियोजन खात्याच्या कलम ३९ (ए) अंतर्गत एकूण २१ प्रस्ताव झोन बदलासाठी मंजूर केल्याची माहिती नगर नियोजनमंत्री विश्वजीत राणे यांनी विधानसभेत लेखी उत्तरात दिली. या प्रस्तावांबाबत ८१ हरकती सादर झाल्या होत्या. तसेच हे सर्व प्रस्ताव नगर नियोजन खात्याच्या प्रादेशिक आराखडा किंवा बाह्य विकास आराखडा नियम–२०२४ अंतर्गत मंजूर केल्याचेही या उत्तरात नमूद केले आहे.
मांद्रेचे आमदार जीत आरोलकर यांनी यासंबंधी प्रश्न नगर नियोजन खात्याला विचारला होता. मात्र हा प्रश्न सभागृहात चर्चेला येऊ शकला नाही. या प्रश्नासंबंधीची लेखी माहिती सभागृहात देण्यात आली. या प्रस्तावांबाबत सादर झालेल्या हरकतींची माहिती गांवनिहाय उपलब्ध नाही, असेही या उत्तरात म्हटले आहे.
सर्वाधिक मोरजीत झोन बदल
विधानसभेत दिलेल्या माहितीनुसार सर्वाधिक झोन बदलाची प्रकरणे मोरजी गावात झाली आहेत. तिथे एकूण ८ प्रस्ताव मंजूर झाले आहेत. यानंतर कोरगांव–५, मांद्रे–३, पार्से–२, तसेच वझरी, धारगळ आणि पेडणेत प्रत्येकी एक प्रस्ताव मंजूर झाला आहे.
२०२२ पासून झोन बदलाची २१ प्रकरणे मंजूर होऊन एकूण २,३६,३६६ चौ. मी. जमिनीचे सेटलमेंट झोनमध्ये रूपांतर झाल्याची माहिती विधानसभेतील उत्तरात देण्यात आली आहे.
