पणजी : एलपीजी सिलिंडरच्या तुटवड्याविरोधात आणि अलीकडील दरवाढीच्या निषेधार्थ गोवा महिला प्रदेश काँग्रेसने शनिवारी पणजी मार्केट येथे आंदोलन केले. आंदोलनादरम्यान महिलांनी “PM is compromised” असे फलक हातात घेतले होते तसेच इंधनाच्या तुटवड्याचे प्रतीक म्हणून सरपणावर स्वयंपाक करण्याचा प्रतीकात्मक प्रयत्न केला.

गोवा महिला प्रदेश काँग्रेसच्या अध्यक्षा प्रतीक्षा खलप यांनी सांगितले की, एलपीजीच्या तुटवड्यामुळे राज्यातील महिलांना मोठ्या अडचणींना सामोरे जावे लागत आहे. “सिलिंडरच्या किंमतीत सुमारे ६० रुपयांची वाढ होऊन दर ९२५ रुपयांवर पोहोचले आहेत. प्रत्येक निवडणुकीपूर्वी दरवाढ-दरकपात अशीच सरकारची रणनीती असते,” असा आरोप त्यांनी केला.

सरकारकडून इंधन साठ्याबाबत दिल्या जाणाऱ्या परस्परविरोधी विधानांवरही त्यांनी प्रश्न उपस्थित केले. “मुख्यमंत्री कधी ५० दिवसांचा तर कधी एक महिन्याचा साठा असल्याचे सांगतात. जर साठा असेल तर लोक सिलिंडरसाठी रांगेत का उभे आहेत?” असा सवाल त्यांनी केला.

काँग्रेस महिला सदस्य अक्षता परब यांनी घरपोच गॅस वितरण व्यवस्थेच्या अपयशाकडे लक्ष वेधत महागाईमुळे सामान्य कुटुंबांचे जगणे कठीण झाल्याचे सांगितले. त्यांनी सिलिंडरचे दर कमी करण्याची मागणी केली.

दरम्यान, गोवा महिला काँग्रेसच्या सरचिटणीस लाविनिया दा कोस्टा यांनी एलपीजीच्या काळाबाजाराबाबत चिंता व्यक्त केली. त्यांच्या मते, काही ठिकाणी सिलिंडर ३,००० ते ५,००० रुपयांपर्यंत विकले जात आहेत, तर तुटवड्याचा परिणाम पर्यटन व हॉटेल व्यवसायावरही होत आहे.

महिला काँग्रेसने एलपीजीचा पुरवठा तात्काळ सुरळीत करावा आणि दरवाढ मागे घ्यावी, अशी मागणी सरकारकडे केली आहे.