पणजी,27 जुलै: कोंकणी भाषा, साहित्य आणि संस्कृतीच्या संवर्धनासाठी उल्लेखनीय योगदान देणाऱ्या साहित्यिक, कलाकार, प्रसारमाध्यम प्रतिनिधी, तंत्रज्ञ आणि संस्थांना दिले जाणारे गोवा कोंकणी अकादमीचे 2025 आणि 2026 या दोन वर्षांचे ‘कोंकणी साहित्य पुरस्कार’ आणि ‘कोंकणी भाषा सेवा पुरस्कार’ जाहीर करण्यात आले आहेत. या सर्व पुरस्कारांचे वितरण ‘कोंकणी राष्ट्रमान्यता दिना’निमित्त 20 ऑगस्ट 2026 रोजी करण्यात येणार आहे.

कोंकणी भाषा, तिचे समृद्ध साहित्य आणि संस्कृतीचे जतन करून ती पुढील पिढीपर्यंत नेण्यासाठी योगदान देणाऱ्या व्यक्ती आणि संस्थांच्या कार्याचा गौरव करणे हे अकादमीचे महत्त्वाचे कर्तव्य असल्याचे गोवा कोंकणी अकादमीने म्हटले आहे.

2025 चे कोंकणी साहित्य पुरस्कार

2025 च्या सर्वोत्कृष्ट कोंकणी साहित्य/ग्रंथ पुरस्कारासाठी विविध साहित्य प्रकारांतील लेखकांची निवड करण्यात आली आहे. कविता विभागात ‘यादींचो गांव’साठी चेतन आचार्य, कथा/कादंबरी विभागात ‘विद्वाट’साठी वामन गोविंद टाकेकर, नाट्यलेखनासाठी ‘सरण जळटना’चे दिपराज सातार्डेकार, तर निबंध/प्रवासवर्णनासाठी ‘कांटेकणगां’चे अभयकुमार वेलिंगकार यांची निवड झाली आहे.

संशोधन/शास्त्रीय विभागात ‘खण वेवसायाचेर आदारीत साहित्य : समाजशास्त्र चिकित्सा’ या ग्रंथासाठी डॉ. भूषण भावे, बालसाहित्यासाठी ‘माणकुलीं आनी शिस्त’च्या श्रद्धा गरड आणि अनुवादासाठी ‘जगावेगळो’च्या अमिता आगशीकार यांना पुरस्कार जाहीर झाला आहे.

गोव्याबाहेरील कोंकणी लेखकासाठीचा साहित्य पुरस्कार मंगळूर-कर्नाटक येथील स्टेन आगेरा यांना ‘धांपल्लीं घडितां (2024)’ या साहित्यकृतीसाठी जाहीर झाला आहे. या प्रत्येक पुरस्काराचे स्वरूप ₹25 हजार, स्मृतीचिन्ह, सन्मानपत्र, शाल आणि श्रीफळ असे आहे.

पुंडलीक नायक, जयंती नायक यांचा विशेष गौरव

2025 च्या कोंकणी भाषा सेवा पुरस्कारांत साहित्य प्रतिभा पुरस्कार पुंडलीक नारायण नायक, तर साहित्य प्रज्ञा पुरस्कार डॉ. जयंती नायक यांना जाहीर झाला आहे. प्रत्येकी ₹50 हजार, स्मृतीचिन्ह, सन्मानपत्र, शाल आणि श्रीफळ असे या पुरस्कारांचे स्वरूप आहे.

युवा चैतन्य पुरस्कार चेतन खेडेकार आणि रोमन रॉड्रिगीस यांना, तर कोंकणी प्रसारमाध्यमांतील कौशल्य पुरस्कार महेश दिवेकार यांना जाहीर झाला आहे.

शणै गोंयबाब कोंकणी भाषा सेवा पुरस्कार आर. बी. एस. कोमरपंत, माधव मंजुनाथ शानभाग कोंकणी भाषा सेवा पुरस्कार डॉ. चंद्रशेखर शणै, कोंकणी कला सेवा पुरस्कार सी. डिसिल्वा आणि कोंकणी डिजिटल कला सेवा पुरस्कार जॉन आगियार यांना जाहीर झाला आहे.

कोंकणी सेवा संस्था पुरस्कार दिवचल कोंकणी सेवा केंद्र, दिवचल-गोवा या संस्थेला प्रदान करण्यात येणार आहे.

2026 च्या साहित्य पुरस्कारांची घोषणा

2026 च्या कोंकणी साहित्य पुरस्कारांत कविता विभागात ‘हांव वाचूंक सोदतां म्हजी वळख’साठी समीर झाटये, कथा/कादंबरी विभागात ‘मम्मी’साठी आगुस बारेटो आणि नाट्यलेखनात ‘होम मिनिस्टर’साठी सुशांत लक्ष्मीकांत नायक यांची निवड झाली आहे.

निबंध/प्रवासवर्णन विभागात ‘शाय आनी अंतरदृश्टी:’साठी एच. मनोज, तर संशोधन/शास्त्रीय-समीक्षा विभागात ‘कोंकणी चम्पू काव्य. गायत्री देवी : भोव आनी प्रभाव’साठी प्रियादर्शनी तडकोडकार यांना पुरस्कार मिळणार आहे.

बालसाहित्य विभागात ‘मिंटू करता मज्जा’साठी फिलोमेना सांफ्रांसिस्को आणि अनुवाद विभागात ‘हाजी अलीची फुलकान्न आनी हेर काणयो’साठी स्नेहलता भाटीकार यांची निवड करण्यात आली आहे.

गोव्याबाहेरील कोंकणी लेखकासाठीचा साहित्य पुरस्कार कारवार-कर्नाटक येथील संदेश श्री. बांदेकर यांना ‘आमगेल कारवार’साठी जाहीर झाला आहे. या प्रत्येक साहित्य पुरस्काराचे स्वरूप ₹25 हजार, स्मृतीचिन्ह, सन्मानपत्र, शाल आणि श्रीफळ असे आहे.

2026 मध्ये देविदास कदम, भालचंद्र गांवकार यांना मानाचे पुरस्कार

2026 चा साहित्य प्रतिभा पुरस्कार देविदास कदम, तर साहित्य प्रज्ञा पुरस्कार भालचंद्र गांवकार यांना जाहीर झाला आहे.

युवा चैतन्य पुरस्कार शलाका देसाय आणि रजत हेगडे यांना देण्यात येणार आहे. कोंकणी प्रसारमाध्यमांतील कौशल्य पुरस्कार लौकीक शिलकार यांना जाहीर झाला आहे.

शणै गोंयबाब कोंकणी भाषा सेवा पुरस्कार उल्हास यशवंत नायक, माधव मंजुनाथ शानभाग कोंकणी भाषा सेवा पुरस्कार टी. आर. सदानंद भट, कोंकणी कला सेवा पुरस्कार प्रिन्स जॅकब आणि कोंकणी डिजिटल कला सेवा पुरस्कार महिम भांडारी यांना जाहीर झाला आहे.

2026 चा कोंकणी सेवा संस्था पुरस्कार ‘अंत्रूज घुडयो’, बांदोडें-फोणें या संस्थेला प्रदान करण्यात येणार आहे.

साहित्य प्रतिभा, साहित्य प्रज्ञा, शणै गोंयबाब कोंकणी भाषा सेवा, माधव मंजुनाथ शानभाग कोंकणी भाषा सेवा आणि कोंकणी कला सेवा पुरस्कारांचे स्वरूप प्रत्येकी ₹50 हजार, स्मृतीचिन्ह, सन्मानपत्र, शाल आणि श्रीफळ असे आहे. युवा चैतन्य, प्रसारमाध्यमांतील कौशल्य आणि डिजिटल कला सेवा पुरस्कारासाठी प्रत्येकी ₹25 हजार रोख रक्कम व अन्य सन्मानचिन्हे देण्यात येणार आहेत.

गोवा कोंकणी अकादमीच्या या पुरस्कार सोहळ्यात दोन वर्षांतील साहित्य, भाषा, कला, प्रसारमाध्यम आणि संस्थात्मक क्षेत्रातील उल्लेखनीय योगदानाचा एकत्रित गौरव केला जाणार आहे.