राज्यव्यापी मोहिमेसाठी काँग्रेस सज्ज

गांवकारी, दि. २७ (प्रतिनिधी)

“गोंय विकपाक दिवचे ना, भाजपाक जिकपाक दिवचे ना” असा नारा देत राज्यव्यापी जनसंपर्क मोहिमेसाठी काँग्रेस पक्ष सज्ज झाला आहे. गोव्याच्या जमिनीच्या कथित विक्रीविरोधात नागरिकांना आपला निषेध नोंदवता यावा, यासाठी ८०८०९६३९३९ हा मिस्ड कॉल क्रमांक जारी करण्यात आला आहे.
गोवा प्रदेश काँग्रेस समितीने गुरुवारी पणजीत आयोजित केलेल्या पत्रकार परिषदेत या मोहिमेची माहिती दिली. भाजप सरकारच्या कार्यकाळात नगरनियोजन कायद्यातील कलम ३९(अ) सारख्या तरतुदींचा वापर करून गोव्याची जमीन बाहेरील लोकांच्या हाती देण्याचे प्रयत्न होत असल्याचा आरोप काँग्रेसने केला. यामुळे गोव्याची जमीन, अस्मिता आणि पारंपरिक जीवनपद्धती धोक्यात येत असल्याचा दावा पक्षाने केला आहे.
या पार्श्वभूमीवर काँग्रेसचे राष्ट्रीय अध्यक्ष मल्लिकार्जुन खरगे यांच्या नेतृत्वाखाली १७ ऑगस्ट रोजी ‘गोंय विकपाक दिवचे ना, भाजपाक जिकपाक दिवचे ना’ ही मोहीम सुरू करण्यात आली होती. आता ही मोहीम राज्याच्या प्रत्येक भागात नेण्याचा निर्णय काँग्रेसने घेतला आहे.
गोवा प्रदेश काँग्रेस अध्यक्ष गिरीश चोडणकर, विरोधी पक्षनेते युरी आलेमाव, दक्षिण गोव्याचे खासदार कॅप्टन विरियातो फर्नांडिस, कार्याध्यक्ष एम. के. शेख, आल्टोन डिकॉस्टा आणि सुनील कवठणकर यांच्यासह पक्षाच्या वरिष्ठ पदाधिकाऱ्यांनी पत्रकार परिषदेत मोहिमेची पुढील दिशा स्पष्ट केली.
कारापूर आंदोलनाला पूर्ण पाठिंबा
काँग्रेसच्या वरिष्ठ नेत्यांनी कारापूर-सर्वण येथे ‘हाऊस ऑफ अभिनंदन लोढा’ या मेगा प्रकल्पाविरोधात सुरू असलेल्या आंदोलनाला पूर्ण पाठिंबा दर्शविला आहे. हे आंदोलन लवकरच दीडशे दिवस पूर्ण करणार असून, कारापूरवासीयांना न्याय मिळवून देण्यासाठी काँग्रेस पक्ष सर्वतोपरी सहकार्य करणार असल्याची माहिती यावेळी प्रदेशाध्यक्ष गिरीश चोडणकर यांनी दिली.
धर्मांतर प्रतिबंधक कायद्याला विरोध
धर्मांतर रोखण्यासाठी विद्यमान कायद्यात आवश्यक तरतुदी असताना धर्मांतर प्रतिबंधक कायदा आणण्याचा भाजपचा प्रयत्न हा केवळ धर्मगुरूंमध्ये दहशत निर्माण करणे आणि विविध धर्मांमध्ये तेढ निर्माण करण्यासाठी असल्याचा आरोप विरोधी पक्षनेते युरी आलेमाव यांनी केला. या विधेयकाला विरोधकांसह सत्ताधारी पक्षातील अल्पसंख्याक आमदारही विरोध करणार असल्याचे जाहीर करण्यात आले आहे.