गांवकारी, दि. १४ (प्रतिनिधी) : केंद्र सरकारने मंजुरी दिलेले ५० एमबीबीएस जागांचे प्रस्तावित वैद्यकीय महाविद्यालय मडगाव येथील दक्षिण गोवा जिल्हा रुग्णालयातच स्थापन करण्यात यावे. यासाठी विद्यमान रुग्णालयाचा दर्जा उंचावून त्याचे अत्याधुनिक सुविधांनी सुसज्ज तृतीयस्तरीय (टर्शियरी) आरोग्य संस्थेत रूपांतर करावे, अशी मागणी ‘मडगावचो आवाज’चे युवा नेते प्रभव नायक यांनी केली आहे. या निर्णयामुळे वैद्यकीय शिक्षणाला चालना मिळण्याबरोबरच दक्षिण गोव्यातील जनतेला प्रगत आरोग्यसेवा उपलब्ध होऊ शकतील, असे त्यांनी म्हटले आहे.

रुग्णालयाचा दर्जा उंचावून अत्याधुनिक आरोग्य सुविधा उपलब्ध करा; ५० एमबीबीएस जागांच्या महाविद्यालयासाठी कालबद्ध आराखड्याची मागणी

मुख्यमंत्री डॉ. प्रमोद सावंत यांनी केंद्र सरकारकडून ५० एमबीबीएस जागांच्या नवीन वैद्यकीय महाविद्यालयाला मंजुरी मिळाल्याची घोषणा केल्यानंतर प्रभव नायक यांनी ही मागणी केली. दक्षिण गोवा जिल्हा रुग्णालयातील उपलब्ध पायाभूत सुविधांचा प्रभावी वापर करून वैद्यकीय महाविद्यालय सुरू करण्याची ही सुवर्णसंधी असल्याचे त्यांनी सांगितले. रुग्णालयाच्या विद्यमान इमारतीतील रिकाम्या मजल्यांचा वापर शैक्षणिक विभाग, प्रयोगशाळा, व्याख्यान कक्ष आणि इतर आवश्यक सुविधांसाठी करता येऊ शकतो, असेही त्यांनी सुचवले.

दक्षिण गोवा जिल्हा रुग्णालयातील अपुऱ्या आरोग्य सुविधांबाबत ‘मडगावचो आवाज’ गेल्या तीन वर्षांपासून सातत्याने आवाज उठवत आहे. या संदर्भात आरोग्यमंत्र्यांना अनेक निवेदने सादर करण्यात आली आहेत. मात्र, रुग्णवाहिकांची कमतरता, अपुरी खाटसंख्या आणि वैद्यकीय कर्मचाऱ्यांच्या रिक्त पदांमुळे रुग्णसेवेवर परिणाम होत असल्याचे नायक यांनी निदर्शनास आणून दिले. नवीन वैद्यकीय महाविद्यालयाच्या निमित्ताने या सर्व समस्यांवर कायमस्वरूपी तोडगा काढण्याची गरज त्यांनी व्यक्त केली.

रुग्णालयात ऑनलाइन पेमेंट सुविधेचा अभाव, अपुरी स्वच्छता व्यवस्था, देखभालीतील त्रुटी आणि व्यवस्थापनातील कमतरता यांसारख्या समस्यांकडेही त्यांनी लक्ष वेधले. रुग्णांना सुरक्षित, स्वच्छ आणि रुग्णस्नेही वातावरण मिळण्यासाठी रुग्णालयाच्या व्यवस्थापनात सुधारणा करणे अत्यावश्यक असल्याचे त्यांनी स्पष्ट केले.

प्रस्तावित वैद्यकीय महाविद्यालय केवळ एमबीबीएस शिक्षणापुरते मर्यादित न ठेवता त्याच्या माध्यमातून संपूर्ण रुग्णालयाचा कायापालट करण्याची आवश्यकता आहे. अत्याधुनिक निदान सुविधा, विविध आजारांवरील विशेष उपचार विभाग, पुरेशा खाटा, चोवीस तास कार्यरत आपत्कालीन सेवा, आवश्यक रुग्णवाहिका आणि प्रशिक्षित वैद्यकीय कर्मचारी उपलब्ध करून देण्याची मागणी नायक यांनी केली.

रुग्णालयातील उपलब्ध जागेचा नियोजनबद्ध वापर करून आवश्यकतेनुसार इमारतीची अंतर्गत पुनर्रचना करण्यात यावी. वैद्यकीय विद्यार्थ्यांसाठी आवश्यक शैक्षणिक सुविधा उभारताना विद्यमान रुग्णसेवेवर कोणताही विपरीत परिणाम होणार नाही, याचीही दक्षता घेणे गरजेचे असल्याचे त्यांनी सांगितले.

वैद्यकीय शिक्षणाबरोबरच रुग्णसेवेलाही प्राधान्य द्या

नवीन वैद्यकीय महाविद्यालय स्थापन करताना वैद्यकीय शिक्षण आणि सार्वजनिक आरोग्यसेवा या दोन्ही बाबींना समान प्राधान्य देण्याची गरज प्रभव नायक यांनी व्यक्त केली. दक्षिण गोव्यातील रुग्णांना प्रगत उपचारांसाठी इतर रुग्णालयांवर अवलंबून राहावे लागू नये, यासाठी जिल्हा रुग्णालयातच सर्वसमावेशक उपचार सुविधा निर्माण करण्यावर सरकारने भर द्यावा, असे त्यांनी सांगितले.

राज्य सरकारने प्रस्तावित वैद्यकीय महाविद्यालय दक्षिण गोवा जिल्हा रुग्णालयात स्थापन करण्याचा निर्णय घेऊन त्यासाठी कालबद्ध कृती आराखडा जाहीर करावा. उपलब्ध सरकारी पायाभूत सुविधांचा जास्तीत जास्त वापर करून सार्वजनिक आरोग्य व्यवस्था अधिक सक्षम करणे हेच सरकारचे प्रमुख उद्दिष्ट असले पाहिजे, असे नायक यांनी स्पष्ट केले.

दक्षिण गोव्यातील नागरिकांना दर्जेदार आरोग्यसेवा आणि विद्यार्थ्यांना वैद्यकीय शिक्षणाच्या अधिक संधी उपलब्ध करून देण्यासाठी सरकारने या प्रस्तावाकडे गांभीर्याने पाहावे, असे आवाहनही प्रभव नायक यांनी केले आहे.