मडगांवात २२ तर म्हापशात २३ रोजी संवाद

गांवकारी,दि.२१ (प्रतिनिधी)

गोव्याची जमीन, पर्यावरण, शेती आणि नियोजनाशी संबंधित विविध प्रश्नांवर जनसहभाग अधिक व्यापक करण्याच्या उद्देशाने ‘इनफ इज इनफ’ गोवा चळवळीचे निमंत्रक तथा निवृत्त न्यायमूर्ती फेर्दिन रिबेलो उत्तर आणि दक्षिण गोव्यातील स्वयंसेवी संस्था आणि युवकांशी संवाद साधणार आहेत. या अंतर्गत मडगाव आणि म्हापसा येथे दोन स्वतंत्र संवाद सत्रांचे आयोजन करण्यात आले आहे.

दक्षिण गोव्यातील स्वयंसेवी संस्था आणि युवकांसाठी मंगळवार, २२ सप्टेंबर रोजी सायंकाळी ५ ते ६ या वेळेत मडगाव येथील ग्रेस चर्च हॉलमध्ये पहिले सत्र होणार आहे. त्यानंतर उत्तर गोव्यासाठी बुधवार, २३ सप्टेंबर रोजी सायंकाळी ५ ते ६ या वेळेत म्हापसा येथील कोमुनिदाद हॉलमध्ये संवाद सत्र आयोजित करण्यात आले आहे.

‘इनफ इज इनफ’ ही न्या. रिबेलो यांच्या नेतृत्वाखाली कार्यरत नागरिक चळवळ असून गोव्याची जमीन, डोंगर, नद्या आणि शेतजमिनींचे संरक्षण तसेच शाश्वत विकासासंबंधी विविध मुद्दे या चळवळीने सातत्याने उपस्थित केले आहेत. चळवळीने यापूर्वी आपल्या दहा कलमी मागण्यांच्या सनदेच्या माध्यमातून जमीन आणि पर्यावरणाशी संबंधित प्रश्नांवर सरकारकडे मागण्या मांडल्या आहेत.
चळवळीचे अध्यक्ष गोविंद शिरोडकर, सरचिटणीस देविदास आमोणकर तथा प्रवक्ते स्वप्नेश शेर्लेकर यांनी पत्रकार परिषदेत ही माहिती दिली.