Gaonkaari
‘इनफ इज इनफ’ च्या हाकेला राज्यभरातून प्रतिसाद
गांवकारी, दि.१६ (प्रतिनिधी)
नगर नियोजन खात्याने वादग्रस्त कलम ३९(ए) अंतर्गत सरसकट जमिनींचा झोन बदल करून त्या रूपांतरासाठी खुल्या केल्याने राज्यभरात तीव्र संताप उसळला आहे. या संतापाला शुक्रवार, १७ रोजी नगर नियोजन खात्यासमोरील ‘इनफ इज इनफ, गोवा’ने आयोजित केलेल्या आंदोलनातून वाट मोकळी होणार आहे.
‘इनफ इज इनफ, गोवा’ चळवळीचे निमंत्रक निवृत्त न्यायमूर्ती फेर्दिन रिबेलो यांनी राज्यभरातील गोंयकारांना शुक्रवार, १७ रोजी सकाळी नगर नियोजन खात्याच्या पाटो-पणजी येथील कार्यालयाबाहेर एकत्र येण्याचे आवाहन केले आहे. चळवळीतर्फे मुख्य नगर नियोजकांना निवेदन सादर केले जाणार आहे. आज आयोजित पत्रकार परिषदेत संघटनेचे नेते देविदास आमोणकर आणि गोविंद शिरोडकर यांनी ही माहिती दिली.
सरकारने दुरुस्त केलेले हे कलम महाघातक असून त्याचा सर्रास गैरवापर सुरू आहे. सर्व जमिनी रूपांतरासाठी खुल्या करण्यात येत आहेत. या रूपांतराचा गोव्याच्या पर्यावरण, समाज आणि आर्थिक भवितव्यावर गंभीर परिणाम होणार आहे. हे कलम रद्द व्हावे, अशी राज्यभरातून मागणी होत असताना सरकार दर आठवड्याला अधिसूचना जारी करून लोकांच्या जखमांवर मीठ चोळत आहे, अशी नाराजी न्यायमूर्ती रिबेलो यांनी व्यक्त केली.
जनशक्तीचे दर्शन घडविण्याची वेळ
सरकारला जनशक्तीचे दर्शन घडविण्याची वेळ आली आहे. सकाळी १० वाजता जमल्यानंतर सह्यांची मोहीम राबवली जाईल. या सह्यांचे निवेदन मुख्य नगर नियोजकांना सादर केले जाईल. राज्यातील सर्व तालुक्यांतील लोकांनी येथे एकत्र येऊन आपला पाठिंबा द्यावा, जेणेकरून सरकारला जनशक्तीची जाणीव होईल आणि हे कलम मागे घेण्याची बुद्धी येईल, असेही यावेळी सांगण्यात आले.
