पणजी, दि. १ (प्रतिनिधी) :** उत्तर गोवा वकील संघटनेच्या अध्यक्षपदी ॲड. एम. एस. जोशी, तर सचिवपदी ॲड. भावेश परब यांची बिनविरोध निवड करण्यात आली आहे. उत्तर गोव्यातील सहा तालुक्यांतील वकिलांचे प्रतिनिधित्व करणाऱ्या या महत्त्वपूर्ण संघटनेच्या नव्या कार्यकारिणीत प्रत्येक तालुक्याला प्रतिनिधित्व देण्यात आले आहे.

नवनिर्वाचित कार्यकारिणीत उपाध्यक्षपदी ॲड. सूर्यकांत नाईक (डिचोली), सहसचिवपदी ॲड. प्रसाद शहापूरकर (पेडणे), तर खजिनदारपदी ॲड. सोनाली नागवेकर (पणजी) यांची निवड झाली आहे. कार्यकारिणी सदस्य म्हणून ॲड. शिवाजी देसाई (वाळपई) आणि ॲड. विजेता पोवळेकर (म्हापसा) यांची निवड करण्यात आली आहे.

उत्तर गोव्यातील सहाही तालुक्यांतील वकिलांना एकत्र आणणारी ही संघटना वकील वर्गाच्या विविध प्रश्नांवर कार्यरत आहे. वकिलांच्या हिताचे संरक्षण, त्यांच्या व्यावसायिक अडचणी सोडविणे आणि न्यायव्यवस्थेशी संबंधित प्रश्नांवर संघटित भूमिका मांडण्याच्या दृष्टीने या संघटनेला विशेष महत्त्व आहे.

नवनिर्वाचित कार्यकारिणी नोव्हेंबरच्या दुसऱ्या आठवड्यात पदभार स्वीकारणार असल्याची माहिती अध्यक्ष ॲड. एम. एस. जोशी यांनी दिली.

या निवडणुकीसाठी निवडणूक अधिकारी म्हणून ॲड. प्रणय कामत आणि त्यांच्या सहकाऱ्यांनी काम पाहिले.