महसूलमंत्र्यांच्या मुलाच्या बेकायदा कृतीवर महसूल खात्याचीच कारवाई

गांवकारी, दि. १९ (प्रतिनिधी)

राजधानी पणजीचे महापौर आणि महसूलमंत्री बाबुश मोन्सेरात यांचे पुत्र रोहीत मोन्सेरात यांच्या ताळगांव येथील सर्वे क्रमांक १८६/३ मधील शेतात टाकण्यात आलेला बेकायदा मातीचा भराव हटविण्याचे काम सुरू झाले आहे. महसूलमंत्र्यांच्या मुलाकडूनच झालेल्या या गैरप्रकारावर महसूल खात्याने कारवाई केल्यामुळे हे प्रकरण चर्चेचा विषय बनले आहे.
मालकीचा वाद आणि बेकायदा बांधकाम
ताळगांव येथील मूळ कोमुनिदादच्या मालकीची ही जमीन आता रोहीत मोन्सेरात यांच्या नावे आहे. या मालकीच्या प्रश्नाचे गांभीर्य वेगळे असले तरीही, या भातशेतात भराव टाकून बेकायदा बांधकाम सुरू असल्याची तक्रार विटो गोम्स यांनी उपजिल्हाधिकारी आणि कृषी खात्याकडे केली होती. ताळगांवमधील आम आदमी पार्टीचे नेते फ्रान्सिस कुएलो आणि सिसील रॉड्रिगीस यांनीही या प्रकरणाविरोधात तक्रार दाखल केली होती. मुंबई उच्च न्यायालयाच्या गोवा खंडपीठाने दिलेल्या आदेशांचे उघड उल्लंघन आणि सरकारच्या शेत जमीन संरक्षण धोरणाच्या विरोधातील कृतीमुळे हे प्रकरण सरकारसाठी मोठी अडचण ठरले आहे.
दैनिक गांवकारीची भूमिका
दैनिक गांवकारीने हा प्रकार उघड करताच मोठी खळबळ उडाली. महसूलमंत्र्यांच्या पुत्राने, जो स्वतः पणजीचा महापौर आहे, बेकायदा कृत्य सुरू ठेवले आणि सरकारी यंत्रणेने त्याकडे दुर्लक्ष केल्याची चर्चा रंगली. यामुळे भरारी पथकाला तातडीने कारवाई करावी लागली, अन्यथा न्यायालयाच्या आदेशाच्या अवमानाचा सामना करावा लागला असता. महसूल सचिव संदीप जॅकीस (आयएएस) यांनीही या प्रकरणाची गंभीर दखल घेतली.
मातीचा भराव हटविण्याचे काम
आज शेतातील मातीचा भराव हटविण्याचे काम वेगाने सुरू आहे. या ठिकाणी उभारलेले बांधकामही पाडण्यात येणार आहे. यापूर्वी येथे अशाच पद्धतीने मातीचा भराव टाकण्यात आला होता, परंतु तक्रारींमुळे काम थांबवण्यात आले होते. आता पुन्हा त्याची सुरुवात झाल्यानंतर प्रशासनाने हस्तक्षेप केला. ताळगांवच्या बाह्य विकास आराखड्यात या शेतातून रस्ता उभारण्याची योजना तयार केली गेली आहे. या योजनेंतर्गत शेतीचा नाश करून जमीन विकासासाठी मोकळी करण्याचा प्रयत्न होत असल्याचा आरोप विटो गोम्स यांनी केला आहे.