काँग्रेसचा सरकारवर हल्लाबोल

गांवकारी, दि. १५ (प्रतिनिधी)

गोव्यावरील कर्जाचा डोंगर तब्बल ३८ हजार कोटी रुपयांवर पोहोचला असताना मुख्यमंत्री डॉ. प्रमोद सावंत यांच्या नेतृत्वाखालील भाजप सरकार जनतेच्या मूलभूत गरजांपेक्षा सरकारी सोहळे आणि इव्हेंटबाजीवर अधिक भर देत असल्याचा आरोप काँग्रेस नेते राहुल म्हांबरे यांनी केला. राज्याची आर्थिक परिस्थिती चिंताजनक बनत असतानाही सरकार खर्चाच्या प्राधान्यक्रमाबाबत गंभीर नसल्याची टीका त्यांनी केली.
विधानसभा अधिवेशनात कर्ज घेतले नसल्याचे मुख्यमंत्र्यांनी सांगितल्यानंतर लगेचच राज्य सरकारने ७०० कोटी रुपयांचे नवे कर्ज कसे घेतले, असा सवाल काँग्रेसचे कार्याध्यक्ष सुनील कवठणकर यांनी उपस्थित केला. अधिवेशनानंतर सरकारने ७०० कोटींचे कर्ज उचलल्याचा दावा करत त्यांनी भाजप सरकारच्या आर्थिक धोरणांवर टीका केली. वाढत्या कर्जाच्या बोजामुळे गोव्याची आर्थिक स्थिती संकटाकडे वाटचाल करत असल्याचा आरोप त्यांनी केला.
सीजेपी आंदोलनाची डीजीपींमार्फत चौकशी करा !
सीजेपीच्या आंदोलनादरम्यान कथितरीत्या देण्यात आलेल्या ‘हिंदुत्व मुर्दाबाद’ घोषणेची पोलीस महासंचालकांच्या स्तरावर सखोल चौकशी करण्याची मागणी गोवा प्रदेश काँग्रेसने केली आहे. धार्मिक तेढ निर्माण करून एसआयआरसंबंधी प्रश्न आणि मुख्य निवडणूक आयुक्त ज्ञानेश कुमार यांच्या राजीनाम्याच्या मागणीवरून जनतेचे लक्ष विचलित करण्यासाठी हा प्रकार नियोजनबद्धरीत्या घडवण्यात आल्याचा संशय काँग्रेसचे कार्याध्यक्ष सुनील कवठणकर यांनी व्यक्त केला. या प्रकरणातील सत्य समोर आणून दोषींवर कठोर कारवाई करण्याची मागणी त्यांनी केली.