गांवकारी, दि. २५ (प्रतिनिधी): आघाडीचे सामाजिक कार्यकर्ते स्वप्नेश शेर्लेकर यांना मोबाईलवरून धमकी देण्याची घटना आज घडली. पर्वरी येथील महानंद अस्नोडकर नामक व्यक्तीने आपण भाजपचा नेता असल्याचा दावा करत स्वप्नेश शेर्लेकर यांच्याशी मोबाईलवरून संवाद साधला.

या घटनेबाबत स्वप्नेश शेर्लेकर यांनी पर्वरी पोलिस स्थानकात तक्रार दाखल केली आहे. अलिकडेच शेर्लेकर यांनी एक व्हिडिओ प्रसारित केला होता. त्या व्हिडिओचा संदर्भ देत अस्नोडकर यांनी त्यांना धमकावले आणि शिवीगाळ केली. मोबाईलवरील हा संवाद रेकॉर्ड करून पोलिसांना सादर करण्यात आला आहे.
याआधी सामाजिक कार्यकर्ते रामा काणकोणकर यांच्यावर झालेल्या प्राणघातक हल्ल्याचे प्रकरण गाजत असतानाच हे नवीन प्रकरण समोर आल्याने एकच खळबळ उडाली आहे. या घटनेचे तीव्र पडसाद उमटले असून सर्व स्तरांतून तीव्र निषेध व्यक्त केला जात आहे.
पोलिसांनी संबंधित व्यक्तीला फोन करून उद्या, शुक्रवार दिनांक २६ रोजी पोलिस स्थानकात हजर राहण्याचे आदेश दिले आहेत.