सावर्डेतील युवकाची कर्करोगाशी झुंज

गांवकारी, दि. ३० (प्रतिनिधी)

सावर्डे येथील श्वेत सावंत यांच्यावर दोनापावला येथील मणिपाल इस्पितळात कर्करोगावरील उपचार सुरू आहेत. या उपचाराचा खर्च मोठा होणार असल्याने त्यांच्या कुटुंबीयांनी मदतीसाठी आवाहन केले आहे.
ड्रम वाजवण्याची कला आत्मसात केलेले श्वेत सावंत हे एक उत्कृष्ट कलाकार आहेत. संगीत ही त्यांची आवड आहे. त्याला कर्करोगाचे निदान झाल्यानंतर मुंबई येथील टाटा मेमोरियल इस्पितळात त्याच्यावर उपचार करण्यात आले होते. तिथून बरा होऊन तो घरी परतला होता. मात्र, आजाराने पुन्हा डोके वर काढल्याने सध्या त्याच्यावर दोनापावला येथील मणिपाल इस्पितळात उपचार सुरू आहेत.
आधीच उपचारावर मोठा खर्च झाल्यानंतर आता नव्या खर्चाचे एक मोठे आव्हान श्वेत सावंत याच्या कुटुंबावर कोसळले आहे. या उपचारासाठी विविध चाचण्या, औषधोपचार तसेच कायम देखरेख यासाठी अंदाजे ४० ते ५० लाख रुपये खर्च अपेक्षित आहे. त्यामुळे श्वेत सावंत याचे कुटुंबीय तसेच मित्रमंडळींनी त्याला मदत मिळवण्यासाठी आवाहन केले आहे.
श्वेत सावंत याच्या मित्रांनी सोशल मीडियावरून मदतीसाठी आवाहन करणारे अनेक व्हिडिओ जारी केले आहेत. सर्वांचा प्रिय आणि एक उत्कृष्ट कलाकार म्हणून श्वेत सावंत याची ओळख असून, त्याच्या आयुष्यावर आलेल्या या कठीण प्रसंगामुळे अनेकांनी दुःख व्यक्त करत त्याला मदत मिळवून देण्यासाठी पुढाकार घेतला आहे.